Дар Раёсати Қӯшунҳои сарҳадии вилояти Суғд Ҷашни байналмилалии Наврӯз таҷлил гардид

ДУШАНБЕ, 06.04.2025. /АМИТ «Ховар»/. Дар Раёсати Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар вилояти Суғд бахшида ба Ҷашни байналмилалии Наврӯз ҳамоиши идона доир гардид.  Дар ин хусус ба АМИТ «Ховар» аз Хадамоти матбуоти Раиси вилояти Суғд иттилоъ доданд.

Аз ҷониби ҳайати Раёсат ва зерсохторҳои Қӯшунҳои сарҳадӣ дар ҷашнгоҳ хаймаҳои наврӯзӣ тибқи оинҳои қадимии ин  иди  бостонӣ  ташкил гардиданд. Инчунин ҳунарҳои мардумӣ ва таомҳои миллии минтақаҳои гуногуни Тоҷикистон ба намоиш гузошта шуданд.

Дар ҳамоиши идона иброз гардид, ки Ҷашни байналмилалии Наврӯз имрӯз ба унвони рамзи ваҳдату ҳамдигарфаҳмӣ, дӯстиву накӯкорӣ ва эҳтиром ба табиату неъматҳои он дар саросари ҷаҳон таҷлил мегардад. Ин ҷашни бостонӣ аҳамияти бузурги фарҳангию маънавии худро ҳифз намуда, омили муҳими муттаҳидсозандаи миллатҳо ба шумор меравад.

Иштирокдорони ҳамоиш аз нақши Президенти Ҷумҳурии Тоҷикистон муҳтарам Эмомалӣ Раҳмон дар мавриди Ҷашни  байналмилалӣ эълон  шудани Наврӯз ёдовар шуданд.

Тавре Пешвои миллат иброз доштанд: «дар масири таърихи тӯлонии халқамон Наврӯз дар баробари забони тоҷикӣ бунёди худшиносии тоҷиконро низ ташкил додааст. Агар забони тоҷикӣ ҳомии осори фаровону ҷовидонаи илмиву адабӣ ва ҳофизаи таърихии мардуми мо бошад, ҷашни Наврӯз дарбаргирандаю нигоҳдорандаи суннатҳои зиндаи халқ, расму ойинҳо ва фарҳанги миллӣ мебошад».

АКС: Хадамоти матбуоти Раиси виляти Суғд