Ҳамкорӣ дар самти рушди технологияҳои инноватсионӣ бо Дафтари Швейтсария оид ба рушд дар Тоҷикистон тақвият меёбад

ДУШАНБЕ, 07.05.2025 /АМИТ «Ховар»/. Агентии инноватсия ва технологияҳои рақамии назди Президенти Ҷумҳурии Тоҷикистон  тасмим гирифтааст, ки ҳамкориро дар самти татбиқи лоиҳаҳои инноватсионӣ бо Дафтари Швейтсария оид ба рушд дар Тоҷикистон таҳким бахшад.

АМИТ  «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад, ки ин ва дигар масъалаҳои марбут ба тавсеаи ҳамкорӣ зимни мулоқоти директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо бо мудири Дафтари Швейтсария оид ба рушд дар Тоҷикистон хонум Саломе Штайб дар Душанбе баррасӣ гардиданд.

Ҷонибҳо доир ба фаъолияти Дафтари Швейтсария оид ба рушд дар Тоҷикистон ва имконияти сармоягузории он ба лоиҳаҳои самти инноватсия ва технологияҳои рақамӣ, аз ҷумла вобаста ба лоиҳаи «Асосҳои рақамии Тоҷикистон», ташаккули ҳукумати электронӣ ва таҳкими иқтисоди рақамӣ дар Тоҷикистон мубодилаи афкор намуданд.

Дар анҷом мусоҳибон барои густариши ҳамкорӣ ба мувофиқа расиданд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон