Дар Душанбе доир ба маблағгузорӣ барои мутобиқшавӣ, коҳиш ва ҷуброни талафоти вобаста ба пиряхҳо ҳамоиш доир шуд

ДУШАНБЕ, 30.05.2025. /АМИТ «Ховар»/. Имрӯз дар доираи Конфронси байналмилалии сатҳи баланд оид ба ҳифзи пиряхҳо дар «Кохи Сомон» таҳти унвони «Маблағгузорӣ барои мутобиқшавӣ, коҳиш ва ҷуброни талафоти вобаста ба пиряхҳо» мизи мудаввар доир шуд. Дар ин хусус ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ доданд.

Зимни ҳамоиш  масъалаи маблағгузорӣ барои мутобиқшавӣ, коҳиш ва ҷуброни талафоти вобаста ба пиряхҳо мавриди баррасӣ қарор дода шуд.

Иштирокдорон аҳамияти маблағгузории дастрас ва пешбинишавандаро махсусан барои давлатҳои осебпазири кӯҳӣ таъкид карда, зарурати шарикии қавитар байни ҳукуматҳо, бонкҳои бисёрҷониба ва бахши хусусиро баён намуданд.

Дар ҳамоиш инчунин барномаҳои нави маблағгузорӣ, аз қабили табодули қарз бо иқлим ва вомбаргҳои пиряхӣ ҳамчун воситаҳои коҳиш додани норасоии маблағ муҳокима карда шуданд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон