«Сомон Эйр» дар ҳамкорӣ бо «АНТАРЕС» ба Шармушайхи Миср парвозҳои мустақимро оғоз менамояд

ДУШАНБЕ, 06.05.2025 /АМИТ «Ховар»/. 11 май ширкати ҳавопаймоии «Сомон Эйр» дар ҳамкорӣ бо ширкати «АНТАРЕС»  (FLY.TJ) ба шаҳри Шармушшайхи Ҷумҳурии Мисри Араб  иҷрои парвозҳои мустақимро оғоз менамояд, иттилоъ медиҳад АМИТ «Ховар» ба истинод ба «Сомон Эйр».

Парвозҳо ҳафтае як маротиба рӯзҳои якшанбе аз тариқи ҳавопаймоҳои бароҳати Боинг 737-800 ва Боинг 737-900 анҷом дода мешаванд. Давомнокии парвоз аз Душанбе ба Шармушшайх 5 соату 30 дақиқа ва дар бозгашт 5 соатро ташкил медиҳад. Хатсайри мазкур барои сайёҳони тоҷикистонӣ, ки мехоҳанд аз соҳилҳои гарми баҳри Сурх, олами аҷиби зериобӣ ва хизматрасониҳои беҳтарин истироҳатгоҳҳои Миср баҳра баранд, имконияти муносиб фароҳам меорад.

Иҷрои парвозҳо дар натиҷаи ҳамкории самаранок бо ширкатҳои сайёҳӣ имконпазир гардидааст.

Директори генералии ширкати ҳавопаймоии «Сомон Эйр» Абдулқосим Валиев мегӯяд, ки «оғози парвозҳо ба Шармушшайх қадами муҳим дар таҳкими муносибатҳои дуҷониба байни давлатҳо мебошад. Итминон дорем, ки ин хатсайр ба афзоиши соҳаи сайёҳӣ, таҳкими робитаҳои иқтисодӣ ва табодули фарҳангӣ мусоидат менамояд».

АКС аз манбаъҳои боз