Кишоварзони шаҳри Панҷакент дар беш аз 3 ҳазор гектар кишти такрорӣ мегузаронанд

ДУШАНБЕ, 25.07.2025 /АМИТ «Ховар»/. Соли равон кишоварзони шаҳри Панҷакент тасмим гирифтаанд, ки баъди ҷамъоварии ҳосили кишти асосӣ дар 3 ҳазору  137 гектар кишти такрорӣ гузаронанд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент хабар медиҳад,  то ин муддат дар 2 ҳазору 860 гектар картошка, шалғам, турб, сабзӣ, зироати хӯроки чорво ва дигар зироат кишт карда шудааст.

Кишоварзони хоҷагиҳои деҳқонии Ҷамоати деҳоти Ёрӣ дар 140 гектар баъди ҷамъоварии ғалла ва картошкаи барвақтӣ кишти такрорӣ мегузаронанд. Таҷрибаи деҳқонони варзида собит кардааст, ки дар иқлими инҷо сабзӣ, шалғам, ҷуворимакка, бодиринг, турб ва дигар зироати зудрас дар кишти такрорӣ ҳосили хуб медиҳад.

Дар боғҳои хоҷагиҳои деҳқонии ҳудуди ҷамоати деҳот низ ҳосил фаровон буда, деҳқонон ҳоло ҷамъоварии меваҳои пешпазакро шуруъ намудаанд.

АКС: Мақомоти иҷроияи ҳокимияти давлатии шаҳри Панҷакент