Дар Намоиш-озмуни ҷумҳуриявии «Беҳтарин лоиҳаи меъморӣ ва шаҳрсозӣ» ғолибон муайян гардиданд

Август 13, 2025 11:39

ДУШАНБЕ, 13.08.2025. /АМИТ «Ховар»/. 8-9 август дар бинои Маркази фароғатии «Хуррамшаҳр»-и шаҳраки Данғараи ноҳияи Данғараи вилояти Хатлон Намоиш-озмуни ҷумҳуриявии «Беҳтарин лоиҳаҳои меъморӣ ва шаҳрсозӣ» баргузор гардид. Дар ин хусус ба АМИТ «Ховар» аз Кумитаи меъморӣ ва сохтмони назди Ҳукумати Ҷумҳурии Тоҷикистон хабар доданд.

Раиси Кумитаи меъморӣ ва сохтмони назди Ҳукумати Ҷумҳурии Тоҷикистон Низом Мирзозода изҳор намуд, ки «меъморӣ на танҳо санъати бунёд кардани иншоот аст, балки оинаи таърих, фарҳанг ва арзишҳои миллӣ мебошад. Имрӯз, дар шароити рушди босуръати мамлакат ва татбиқи лоиҳаҳои бузурги инфрасохторӣ нақши меъморону лоиҳакашон, муҳандисон ва мутахассисони соҳа беш аз пеш муҳим гардидааст. Боиси ифтихор аст, ки маҳз бо ҳидоят ва сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон соҳаи меъморӣ ва шаҳрсозӣ дар ҷумҳурӣ рушду такомул ёфта, барои фаъолияти босамари мутахассисони соҳа заминаҳои мусоиди касбию ҳуқуқӣ фароҳам оварда шудаанд».

Дар таърихи давлатдории Тоҷикистони соҳибистиқлол ба масъалаи рушди бемайлони санъати меъморию шаҳрсозӣ, ки таъриху анъанаҳои миллии ҳазорсола дорад, аз ҷониби роҳбарияти олии сиёсии мамлакат таваҷҷуҳи махсус зоҳир мегардад. Натиҷаи ҳамин талошҳо буд, ки ҳоло бо саъю кӯшиши ватандӯстонаи меъморону лоиҳакашон ва сохтмончиён санъати меъморию шаҳрсозии бостонии мо мазмуни нав касб кардааст. Кормандони ин соҳаи пешбарандаи ҷамъият ба дастовардҳои назаррасу муҳим ноил гардида, дар арсаи байналмилалӣ мавқеи устуворро ишғол менамоянд.

Иттилоъ дода шуд, ки барои иштирок дар намоиш-озмуни ҷумҳуриявӣ 140 лоиҳа аз рӯи номинатсияҳои «Биноҳо ва маҷмааҳои истиқоматии бисёрошёна», «Иншооти иҷтимоӣ, ҷамъиятӣ ва фарҳангӣ» ва «Асари меъмории донишҷӯён» пешниҳод гардид. Ҳамзамон аз ҷониби лоиҳакашони варзида зиёда аз 453 лоиҳаи беҳтарин ва макети биною иншооти таъйиноти гуногун ба намоиш гузошта шуд.

Пас аз маросими ифтитоҳ иштирокчиёни намоиш бо корҳои ободонию созандагӣ дар ноҳияи Данғара, бахусус бунёди бинову иншооти шаҳраки Данғара, деҳаҳои Пушинг ва Ғар-ғараи ноҳия шинос шуданд.

Раиси Кумитаи меъморӣ ва сохтмони назди Ҳукумати Ҷумҳурии Тоҷикистон зимни табрики ғолибону ҷоизадорони ин намоиш-озмун, ки дар сатҳи баланд доир шуд, оид ба дастгирию ғамхориҳои асосгузори ҳамаи бунёдкориҳои азим дар соҳаи меъмории мамлакат- Президенти Ҷумҳурии Тоҷикистон муҳтарам Эмомалӣ Раҳмон сухан гуфт.

Аз байни 140 лоиҳаи ба озмун пешниҳодшуда ҳайати ҳакамон беҳтаринҳоро муайян намуданд. Ғолибон аз тарафи роҳбарияти Кумитаи меъморӣ ва сохтмон бо Диплом ва туҳфаҳои хотиравию молӣ қадрдонӣ гардиданд.

АКС: Кумитаи меъморӣ ва сохтмони назди Ҳукумати Ҷумҳурии Тоҷикистон

Август 13, 2025 11:39

Хабарҳои дигари ин бахш

РӮЗИ МОШИНСОЗОН. Дар Тоҷикистон соҳаи мошинсозӣ дар ҳоли рушд қарор дорад
Ҳайати Тоҷикистон дар иҷлосияи 36-уми Шурои байнидавлатии обуҳавошиносии кишварҳои ИДМ иштирок намуд
Судяҳои Тоҷикистон дар Конфронси байналмилалии антикризисӣ дар Қазоқистон иштирок намуданд
Масъалаҳои ислоҳоти судӣ байни Суди Олии Ҷумҳурии Тоҷикистон ва Барномаи рушди СММ баррасӣ гардиданд
ЗАНОН ВА СИЁСАТИ МИЛЛӢ. Дар ин мавзуъ ҳамоиши вакилзанон доир шуд
Муносибатҳои сиёсию иқтисодӣ ва фарҳангии Тоҷикистон бо давлатҳои Аврупо баррасӣ гардид
Дар доираи иҷлосияи 80-уми Маҷмаи Умумии Созмони Милали Муттаҳид масъалаҳои соҳаи тандурустӣ баррасӣ гардиданд
Доир ба нақши Мактаби давлатдории Эмомалӣ Раҳмон дар таҳкими маориф ва рушди он конференсия баргузор шуд
Дар ноҳияи Рӯдакӣ ҷаласаи Шурои муросо баргузор гардид
Дар Тоҷикистон маъракаи иммунизатсия бар зидди вируси папилломаи одам оғоз мегардад
Дурнамои ҳамкории Тоҷикистон ва Туркия дар самти меҳнат ва шуғли аҳолӣ баррасӣ гардид
Вобаста ба баланд бардоштани тавонмандсозӣ барои самаранокии идораи давлатӣ ҳамоиш доир шуд