Хадамоти гумруки Тоҷикистон: дар содироти молҳои ватанӣ вазни қиёсии асосиро сурма ва маҳсулоти он дар ҳаҷми 30,4 фоиз ташкил медиҳад

Август 8, 2025 17:00

ДУШАНБЕ, 08.08.2025 /АМИТ «Ховар»/. Гардиши тиҷорати хориҷии Тоҷикистон дар шаш моҳи соли равон ба 4 миллиарду 746,8 миллион доллар баробар гардида, дар сохтори умумии гардиши мол ҳиссаи воридот 80,1 фоиз ва содирот 19,9 фоизро ташкил медиҳад. Дар ин хусус Сардори Хадамоти гумруки назди Ҳукумати Ҷумҳури Тоҷикистон Хуршед Каримзода 7 август зимни нишасти матбуотӣ дар Душанбе ба хабарнигорон иттилоъ дод.

Гуфта шуд, ки дар ин давра ба ҷумҳурӣ дар ҳаҷми беш аз 3,8 миллиард доллар молу маҳсулот ворид карда шудааст, ки нисбат ба ҳамин давраи соли 2024 ба маблағи 326,7 миллион доллар ё 9,4 фоиз зиёд мебошад. Содирот ба 943,2 миллион доллар баробар шуда, нисбат ба ҳамин давраи соли 2024 53 миллион доллар ё 5,3 фоиз коҳиш ёфтааст.

Дар содироти молҳои ватанӣ вазни қиёсии асосиро сурма ва маҳсулоти он дар ҳаҷми 30,4 фоиз (286,5 миллион доллар), маъданҳо ва консентратҳо — 26,9 фоиз (253,4 миллион доллар), алюминийи коркарднашуда — 12,8 фоиз (120,5 миллион доллар), нахи пахта — 5,8 фоиз (54,7 миллион доллар), маҳсулоти меваю сабзавот — 3,4 фоиз (32,5 миллион доллар), ресмони пахтагӣ — 1,4 фоиз (13,6 миллион доллар), ангиштсанг — 1,1 фоиз (10,4 миллион доллар, семент — 1,0 фоиз (9,8 миллион доллар) ва пӯст — 0,2 фоиз (1,6 миллион доллар) ташкил медиҳанд.

Хуршед Каримзода иброз дошт, ки нисбат ба шашмоҳаи якуми соли 2024 содироти мол ба кишварҳои Ҳолланд ба маблағи 262,7 миллион доллар, Узбекистон 27,6 миллион доллар, Чин 24,7 миллион доллар, Туркия 16,4 миллион доллар, Белгия 7,6 миллион доллар, Покистон 5,6 миллион доллар ва Қирғизистон 1,8 миллион доллар афзоиш ёфтааст.

Инчунин дар ин давра содироти мол ба давлатҳои Қазоқистон 79,1 миллион доллар, Эрон 8,3 миллион доллар, Русия 5,3 миллион доллар ва Аморати Муттаҳидаи Араб 1,3 миллион доллар коҳиш ёфтааст.

Марзия САИДЗОДА,
АМИТ «Ховар»

АКС: АМИТ «Ховар»

Август 8, 2025 17:00

Хабарҳои дигари ин бахш

Ташаббусҳои глобалии Тоҷикистон дар соҳаи об дар ҷаласаи Конфронси исломии вазирони масъул оид ба масъалаҳои об дар Ҷидда баррасӣ гардид
Дар ноҳияи Восеъ иншооти таъйиноти гуногун мавриди истифода қарор гирифтанд
Ширкати чинӣ ба бунёди неругоҳҳои офтобӣ ва бодӣ дар Тоҷикистон таваҷҷуҳ зоҳир намуд
Имсол беш аз 30 ҳазор сайёҳон бо мавзеъҳои таърихии ноҳияи Восеъ шинос гардиданд
Лоиҳаи «Барномаи рушди иқтисодию иҷтимоии шаҳри Душанбе барои солҳои 2026–2030» муаррифӣ карда шуд
Имконияти содироти маҳсулоти кишоварзии Тоҷикистон ба Русия баррасӣ гардид
Хадамоти обуҳавошиносии Тоҷикистон ва Русия ҳамкориро тақвият медиҳанд
Ҳайати Тоҷикистон дар ҷаласаи Шурои маъмурии Ташкилоти патентии Авруосиё иштирок намуд
Дар Конгресси ҷаҳонии обуҳавошиносӣ татбиқи ташаббуси ҷаҳонии «Огоҳкуниҳои бармаҳал барои ҳама» баррасӣ гардид
Дар шаҳри Хоруғ 13 корхонаи нави саноатӣ ба фаъолият оғоз намуд
Дар нуҳ моҳ беш аз 1,5 миллион сайёҳ мавзеъҳои ҷолиби Тоҷикистонро тамошо намуданд
Дар Тоҷикистон беш аз 45 ҳазор хоҷагии деҳқониро занон роҳбарӣ менамоянд