Нақшаи амали татбиқи Ёддошти тафоҳум байни вазоратҳои молияи Тоҷикистон ва Қирғизистон оид ба ҳамкорӣ ба мувофиқа расид

 ДУШАНБЕ, 12.08.2025 /АМИТ «Ховар»/. 9 август дар шаҳри Бишкек зимни мулоқоти ҳайати Ҷумҳурии Тоҷикистон таҳти роҳбарии муовини якуми Вазири молия Юсуф Маҷидӣ бо роҳбарияти «Холдинги молиявии давлатӣ», «Бонки давлатии рушд» ва «Фонди кафолатӣ» аҳамияти мубодилаи таҷрибаҳои амалӣ дар самтҳои дастгирии соҳибкорӣ, татбиқи лоиҳаҳои инфрасохторӣ ва идоракунии молияи давлатӣ таъкид карда шуд.

Тавре АМИТ «Ховар» бо истинод ба Вазорати молия хабар медиҳад, аз ҷониби роҳбарияти «Холдинги молиявии давлатӣ», «Бонки давлатии рушд» ва «Фонди кафолатӣ» модели институтсионалӣ, таҷрибаи дастгирии соҳибкорӣ, механизмҳои кафолатдиҳии қарзӣ ва маблағгузории рушди ин ташкилоти молиявӣ муаррифӣ гардиданд.

Ҳамзамон аз ҷониби муовини якуми Вазири молияи Ҷумҳурии Тоҷикистон Юсуф Маҷидӣ ва муовини Вазири молияи Ҷумҳурии Қирғизистон Эрнст Калдибаев «Нақшаи амал вобаста ба татбиқи Ёддошти тафоҳум байни Вазорати молияи Ҷумҳурии Тоҷикистон ва Вазорати молияи Ҷумҳурии Қирғизистон оид ба ҳамкорӣ барои солҳои 2026 — 2028» мувофиқа карда шуд.

АКС: Вазорати молияи Ҷумҳурии Тоҷикистон