Дар Ҷамоати деҳоти Дӯконии шаҳри Норак бинои муассисаи томактабӣ сохта мешавад

ДУШАНБЕ, 14.09.2025. /АМИТ «Ховар»/. Дар деҳаи Чал-Чали Ҷамоати деҳоти Дӯконии шаҳри Норак корҳои сохтмонӣ дар бинои муассисаи томактабӣ барои 80 кӯдак идома доранд. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Норак иттилоъ доданд.

Ин иқдом дар доираи амалисозии дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон барои рушди соҳаи маориф ва фарогирии бештари кӯдакон ба муассисаҳои томактабӣ ба роҳ монда шудааст.

Иттилоъ дода шуд, ки бино бо саҳми соҳибкорон сохта шуда, ҳоло корҳои бетонрезӣ идома доранд. Иншоот дуошёна буда, аз ҳуҷраҳои хоб, гурӯҳи кӯдакона, ошхона, ҷойи ҷомашӯӣ, утоқи тиббӣ ва утоқи директор иборат мебошад.

Сохтмони чунин кӯдакистонҳо ба ояндаи дурахшони фарзандон таъсири хуб мерасонад.

  АКС: Мақомоти иҷроияи ҳокимияти давлатии шаҳри Норак