Дар Душанбе ҷаласаи 107-уми Шурои иқтисодии Иттиҳоди Давлатҳои Мустақил доир мегардад

ДУШАНБЕ, 04.09.2025 /АМИТ «Ховар»/. Пагоҳ, 5 сентябр дар пойтахти Тоҷикистон –шаҳри Душанбе ҷаласаи 107-уми Шурои иқтисодии Иттиҳоди Давлатҳои Мустақил баргузор мегардад.

Тавре ба АМИТ «Ховар» аз дафтари матбуоти Кумитаи иҷроияи Иттиҳоди Давлатҳои Мустақил хабар доданд, ҷаласа дар шаҳри Душанбе дар соли раёсати Тоҷикистон дар ин созмон баргузор мешавад. Ҷаласаро муовини аввали Сарвазири Ҷумҳурии Тоҷикистон Ҳоким Холиқзода роҳбарӣ менамояд.

Ба ҳайати Шурои иқтисодии Иттиҳоди Давлатҳои Мустақил муовинони раисони ҳукуматҳои давлатҳои аъзо оид ба масъалаҳои иқтисодӣ дохил мебошанд.

Дар ҷаласа баррасии якчанд масъалаи муҳим дар назар аст, аз ҷумла:

Стратегияи рақамикунонии долонҳои асосии нақлиётии мултимодалии кишварҳои аъзои Иттиҳоди Давлатҳои Мустақил;

Стратегияи ҳамкорӣ дар рушди ҷомеаи иттилоотӣ ва иқтисодиёти рақамӣ барои давраи то соли 2035;

Стратегияи рушди илмӣ-технологии Иттиҳоди Давлатҳои Мустақил барои солҳои 2026-2035;

Нақшаи чорабиниҳо оид ба омодагӣ ва татбиқи Соли тандурустӣ дар Иттиҳод дар соли 2026.

Тибқи муҳокимаҳо лоиҳаи ҳуҷҷатҳо барои баррасӣ ба Шурои сарони ҳукуматҳои Иттиҳоди Давлатҳои Мустақил пешниҳод карда мешавад.

АКС: АМИТ «Ховар»