ТЕАТР — ОИНАИ ЗИНДАГӢ. Дар Душанбе шаш театри касбӣ фаъолият мекунад

Ноябрь 7, 2025 13:00

ДУШАНБЕ, 07.11.2025 /АМИТ «Ховар»/. Дар Ҷумҳурии Тоҷикистон 18 театри касбӣ фаъолият дорад, аз ин теъдод 6 театр дар шаҳри Душанбе ҷойгир мебошад. Ба муносибати Рӯзи театри тоҷик, ки ҳамасола 7 ноябр таҷлил мегардад, АМИТ «Ховар» шарҳи мухтасар доир ба театрҳои касбии дар пойтахт фаъолиятдоштаро пешниҳод менамояд.

Президенти мамлакат муҳтарам Эмомалӣ Раҳмон дар яке аз суханрониҳо иброз доштанд, ки: «театр воситаи пуриқтидортарини таъсиррасонӣ ба тафаккури инсон аст, зеро рӯйдодҳои зиндагиро дар саҳна дида, тамошобин худро хаёлан ба қаҳрамонҳои мусбат монанд мекунад ва бо ҳамин роҳ олами ботинии хешро мустақилона комил мегардонад».

Театри давлатии академии драмавии ба номи Абулқосим Лоҳутӣ яке аз театрҳои аввалини давлатӣ — касбии Ҷумҳурии Тоҷикистон мебошад. Тибқи сарчашмаҳои таърихӣ, театр нахустин маротиба 7 ноябри соли 1929 ба фаъолият оғоз намуд. Ин театри драмавӣ буд, ки баъдтар, соли 1933 ба он номи адиб Абулқосим Лоҳутӣ гузошта шуд. Бинои ин театр дар «Хонаи деҳқон», собиқ бинои Театри русии ба номи В. Маяковски ҷойгир буд. Ҳайати театри навбунёд аз ҳафт нафар иборат буданд.

Театри давлатии академии опера ва балети ба номи Садриддин Айнӣ соли 1935 ҳамчун Театри мусиқӣ ташкил ёфт. Соли 1940 ҳамчун Театри давлатии опера ва балети Тоҷикистон таъғири ном кард. Соли 1954 театр ба номи устод Садриддин Айнӣ номгузорӣ шуд. Соли 1971 барои муваффақиятҳои эҷодӣ ба театр унвони театри академӣ дода шуд. Жанри репертуари театр опера ва балет мебошад.

Театри давлатии драмаи русии ба номи Владимир Маяковскийи дар шаҳри Душанбе 7 ноябри соли 1937 таъсис ёфтааст. Театри давлатии драмаи русии ба номи Владимир Маяковский – яке аз муассисаҳои театрии тобеи Вазорати фарҳанги Тоҷикистон мебошад. Нахустин мавсимро театр бо спектакли «Замин»-и Н.Вирти оғоз кардааст. Жанри театр драмавӣ мебошад.

Театри давлатии ҷавонони Тоҷикистон ба номи Маҳмудҷон Воҳидов, ки бар асоси студияи тоҷикии Донишгоҳи давлатии ҳунари театрии ба номи А. Луначарскийи Москва соли 1971 таъсис ёфтааст. Соли 1978 театри мазкур номи М. Воҳидов – Ҳунарпешаи халқии Тоҷикистонро гирифт. Дар тӯли солҳои охир дар Театри давлатии ҷавонони Тоҷикистон ба номи М. Воҳидов таҷрибаву суннатҳои наслҳои пешинро ҷавонони соҳибистеъдод ҳифз намуда, идома мебахшанд.

Театри давлатии лӯхтак – яке аз муассисаҳои театрии тобеи Вазорати фарҳанги Тоҷикистон мебошад. Театр 7 сентябри соли 1985 таъсис ёфтаст. Бинои он дар наздии Боғи кӯдакони шаҳри Душанбе воқеъ аст. Дар ин бино барои ҳунармандон шароити мусоид фароҳам оварда шудааст.