Кабк «Парандаи сол-2026» интихоб гардид

ДУШАНБЕ, 28.12.2025 /АМИТ «Ховар»/. Дар Тоҷикистон аз байни 10 парандаи пешниҳодгардида кабк «Парандаи сол-2026» интихоб гардид, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Ин тасмим дар озмуни «Парандаи сол-2026», ки ба тариқи овоздиҳии пинҳонӣ доир гардид, гирифта шуд.

Ҳадафи озмуни «Парандаи сол» тарғибу ташвиқи муносибати эҳтиромона нисбат ба табиат, зебоӣ ва муаррифии намудҳои гуногуни паранда ва нақши онҳо дар экосистемаҳо мебошад.

Кабк яке аз зеботарин парандаҳои табиати Тоҷикистон буда, дар зиракию ҳушёрӣ нисбат ба дигар мурғони хушхон бартарӣ дорад. Дар бораи парвариш ва шикори кабк дар байни мардум донишу таҷрибаҳои зиёд мавҷуд аст. Ҳатто бовару эътиқод, ривоятҳои гуногуни фолклорӣ, инчунин расму одатҳои аҷибе нисбат ба кабк дар байни мардуми тоҷик мавҷуд мебошанд.

Бояд ёдовар шуд, ки кабк зебоии табиатро бо овози хушу дилнишинаш боз ҳам зеботар мегардонад. Садои форами кабкро бисёриҳо хуш доранд. Садои хуши кабк бештар ба бемории асаб шифо мебахшад. Гӯшти кабк серғизо буда, ба баъзе бемориҳо давобахш аст.

Кабк парандаи зебо ва хушовоз буда, ҷуссааш миёна, вазни кабки модина 350—550 грамм, болаш 142—162 милиметр, кабки нарина 450—750 грамм, болаш 157—175 милиметр мебошад. Рангаш ҷигарии равшан ва кабудтоб буда, дар паҳлуяш хатҳои кӯндаланги сиёҳ, сурхчаи тира ва сафед дошта, нӯлаш ва пойҳояш сурх мебошанд. Кабк асосан дар нишебиҳои санглохи кӯҳсор сукунат мекунад. Баъзан дар буттазори анбӯҳ ва дарахтзор низ вомехӯрад.

Ёдовар мешавем, ки дар Тоҷикистон шуруъ аз соли 2008, яъне давраи аввали баргузории озмуни «Парандаи сол» парандагони гуногун, аз қабили мурғи ҳумо, ғози кӯҳӣ, кабки дарӣ, бум, зоғчаи кабуд, тазарв, лаклаки сафед, товусаки биҳиштӣ, мурғи ҳилоли тибетӣ, ҳудҳуд, шоҳин, фароштуруки деҳотӣ, шоҳуқоб, заргулдор, саъба, фохтак ва дуғдоғи зебо парандаи сол интихоб гардидаанд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон