Имсол дар хоҷагиҳои кишоварзии шаҳри Панҷакент дар 2,5 ҳазор гектар картошка кишт карда мешавад

ДУШАНБЕ, 22.02.2026 /АМИТ «Ховар»/. Имсол дар хоҷагиҳои кишоварзии шаҳри Панҷакент дар 2,5 ҳазор гектар, аз ҷумла дар 1000 гектар картошкаи барвақтӣ кишт карда мешавад.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент хабар медиҳад, кишоварзони хоҷагиҳои деҳқонии деҳоти Ёрӣ нахустин шуда, ба кишти картошкаи барвақтӣ шуруъ намуданд.

Бо истифода аз рӯзҳои офтобӣ дар хоҷагиҳои инфиродии «Хайрулло», «Аваз» ва дигарон то ин муддат дар 3,5 гектар картошка шинонида шуда, кишти он ҳоло идома дорад.

Таҷрибаи деҳқонони собиқадор собит менамояд, ки дар иқлими Ёрӣ аз картошкаи барвақтӣ, ки то баланд шудани ҳарорати ҳаво пухта мерасад, ҳосили хуб гирифтан мумкин аст. Онҳо имсол майдони кишти ин зироати муҳими ғизоиро ба 200 гектар мерасонанд, ки як қисми он барвақтӣ аст.

АКС: Мақомоти иҷроияи ҳокимияти давлатии шаҳри Панҷакент