Дар Донишгоҳи давлатии Хуҷанд озмуни «Беҳтарин эҷодкори достонҳои «Шоҳнома»» ҷамъбаст гардид

ДУШАНБЕ, 17.03.2026 /АМИТ «Ховар»/. 16 март дар Донишгоҳи давлатии Хуҷанд ба номи академик Бобоҷон Ғафуров  озмуни эҷодӣ таҳти унвони «Беҳтарин эҷодкори достонҳои «Шоҳнома»» байни донишҷӯён, ки бо мақсади гиромидошти шоҳасари Абулқосими Фирдавсӣ – «Шоҳнома» баргузор шуд, ҷамъбаст гардид.

Тавре АМИТ «Ховар» бо истинод ба донишгоҳ хабар медиҳад, дар озмун корҳои эҷодии донишҷӯёни факултети санъати тасвирӣ ва дизайн ба намоиш гузошта шуда, иштирокчиён саҳнаҳои гуногуни достонҳои «Шоҳнома»-ро бо усулҳои мухталифи эҷодӣ, аз ҷумла бо чангаки бофандагӣ, шаббаҳои гуногунранг, инчунин тавассути расмҳои тасвирӣ бо истифода аз рангҳои ҷолиб ва услуби бадеӣ инъикос намуданд.

Дар фарҷоми озмун беҳтарин иштирокчиён бо Сипоснома ва туҳфаҳои хотиравӣ қадрдонӣ гардиданд.

Иброз гардид, ки баргузории чунин озмунҳо рамзи арҷгузорӣ ба мероси адабӣ ва фарҳангии миллати тоҷик буда, ба баланд бардоштани сатҳи маърифату фарҳанг ва таҳкими худшиносии миллӣ дар ҷомеа, шиносоии бештари ҷавонон бо достонҳои қаҳрамонӣ ва ахлоқии «Шоҳнома» мусоидат менамояд.

АКС: Донишгоҳи давлатии Хуҷанд ба номи академик Бобоҷон Ғафуров