ШҲШР рақобатпазирии иқтисодии Тоҷикистонро дастгирӣ мекунад

 Душанбе, 10. 02. 2015.( АМИТ «Ховар», Фарзона Достонзода) — Ноил шудан ба гуногунсамтӣ ва рақобатпазирии назарраси иқтисодии Тоҷикистон ҳамчун ҳадафи асосии аъзои Шӯрои ҳамоҳангсозии шарикони рушд (ШҲШР)  дар ҷаласаи имрӯзаи Шӯрои миллии рушд ва Форуми рушди Тоҷикистон, ки аз тарафи Президенти кишвар Эмомалӣ Раҳмон ва Сарвазир Қоҳир Расулзода раисӣ мешуд, эълон гардид.   
Тавре ки ба АМИТ «Ховар» аз ШҲШР иттилоъ доданд, ҷаласаи мазкур анҷоми амалӣ намудани «Стратегияи миллии рушд барои солҳои 2008-2015» ва «Стратегияи баланд бардоштани сатҳи некӯаҳволии мардуми Тоҷикистон барои солҳои 2013-2015»-ро қайд намуд.
Аъзои  ШҲШР, ки аз 30 ташкилоти бисёрҷониба, дуҷониба ва ташкилотҳои аъзои Созмони миллали муттаҳид иборатанд, иқдоми давлатро дар ноил шудан ба афзалиятҳои стратегӣ, алалхусус ноилшавӣ ба истиқлолияти энергетикӣ, беҳтар намудани иртибототи нақлиётӣ, таъмини амнияти озуқаворӣ, беҳтар намудани идораи давлатӣ, рушди бахши хусусӣ ва захираҳои инсонӣ таҳсин намуданд. Инчунин дигар иштироккунандагони ҷаласа мушкилоти ҷойдоштаро вобаста ба беҳтар намудани сатҳи некӯаҳволӣ ва кам кардани сатҳи камбизоатӣ, алалхусус дар деҳот муҳокима намуданд.
Ҳамчун қадамҳои минбаъда, шарикони рушд  бори дигар изҳори омодагии дастгирии молиявӣ ва техникиро дар  ноил шудан ба ҳадафҳои рушд ва афзалиятҳо, ки дар «Стратегияи миллии рушди солҳои 2016-2030» иброз намуданд. Стратегияи нав диққати асосиро ба мавзӯъҳои беҳтар намудани самаранокии иқтисодии кишвар, гуногунсамтӣ ва рақобатпазирӣ медиҳад. Амалисозии муштараки раванди мазкур боиси рушди боз ҳам самараноктар тавассути ҳамкории зичи шарикони байналмилалии рушд ва Ҳукумат дар солҳои оянда хоҳад гардид.