Хуҷанд: Вазъи таъминот бо оби полезӣ дар минтақаҳо беҳтар шуд

Хуҷанд, 29.12.2015. (АМИТ «Ховар»). — Бо мақсади беҳтар намудани таъминоти оби полезӣ ва ҳолати мелиоративии заминҳо, ки омили муҳими баланд бардоштани боздеҳи замин арзёбӣ мешавад, тадбирҳо андешида шуда, аз ҳисоби буҷети вилояти Суғд бо ин мақсад зиёда аз 2,6 млн. сомонӣ маблағҳо равона гардиданд.
Ин маблағҳо асосан барои беҳтар намудани таъмини обрасонӣ ба мавзеи “Сексарӣ” барои дастрас намудани 1 дастгоҳи пойгоҳи обкашии “Қизилӣ-4”, барои таъмини оби полезии заминҳои ноҳияи Спитамен барои дастрас намудани 1 муҳаррики барқӣ барои пойгоҳи обкашии “Новая”, барои таъмини оби полезии ҷамоати деҳоти Равшани ноҳияи Зафаробод баҳри  кофтани 20 адад чоҳи амудӣ ҷудо гардиданд.
Ҳамзамон, дар ин давра якҷоя бо Агентии беҳдошти замин ва обёрии назди Ҳукумати Ҷумҳурии Тоҷикистон 2 дастгоҳҳои обкашӣ ба пойгоҳи обкашии “Дилварзин-2”-и ноҳияи Мастчоҳ ва 2 адад ба пойгоҳҳои обкашии “Ёрӣ” ва “Нилуфар”-и шаҳри Панҷакент дастрас ва насб шуда, таъминоти оби полезӣ дар ин минтақаҳо беҳтар гардид.