Тахфифҳои нави тарофавии “Роҳи оҳани Тоҷикистон” ва “Узбекистон темир йуллари”

Душанбе, 20.01.2016 (АМИТ «Ховар») .- КВД “Роҳи оҳани Тоҷикистон” ва ҶС “Узбекистон темир йуллари” оғози соли равон оид ба пешниҳоди сабукиҳои (тахфифҳои) нави тарофавӣ ба мувофиқа расиданд.
Тибқи мувофиқа аз ҷониби ҶС “Узбекистон темир йулларӣ” барои интиқоли транзитии маҳсулоти нафтӣ, алюминий ва хокаи алюминий аз тариқи истифодаи қитъаи роҳи оҳани Қароқалпоқистон-Қудуқли ва Келес-Қудуқли 15% ва барои дигар намуди борҳо 10% сабукӣ (тахфиф) ба тарофаи мутобиқи сиёсати тарофавии роҳҳои оҳани маъмурияти кишварҳои ИДМ муқаррарнамуда, дар давоми сол пешниҳод шудааст.
Инчунин сабукиҳо дар мавриди интиқоли содиротии борҳои гуногун аз Ҷумҳурии Узбекистон ба Ҷумҳурии Тоҷикистон пешниҳод гардиданд.
Ҳамзамон коэффитсиентҳои (1,83; 1,63; 1,62) баландкунандаи тарофа, ки то ин дам дар қитъаи роҳи оҳани Болдир-Қудукли ва ба баръакс истифода мегардиданд, бекор шудаанд.
Барои интиқоли транзитии мусофирон дар ҳамаи хатсайрҳо тахфифи 15 % барои соли 2016 пешниҳод гардидааст, ки ин бори аввал дар муносибати байни роҳҳои оҳани ин ду кишвар мебошад.