Барномаи консертӣ бахшида ба 100 — солагии ҳунарманди мумтози шашмақомхон Нериё Аминов

Душанбе, 13.05.2016 /АМИТ «Ховар»/. Бо ташаббуси Вазорати фарҳанги Ҷумҳурии Тоҷикистон ва Фонди ба номи Нериё Аминови шаҳри Ню — Йорк дар Театри давлатии академии опера ва балети ба номи С. Айнӣ 29 майи соли равон бахшида ба 100 — солагии ҳунарманди мумтози сабки Шашмақом Нериё Аминов барномаи консертӣ бо иштироки беҳтарин сарояндагони Шашмақом баргузор мешавад.
Нериё Аминов аз зумраи саршиносони санъати касбии мусиқии тоҷик маҳсуб мешавад, ки қариб тамоми умри пурбаракати хешро сарфи хидмат ба мардуми Тоҷикистон намудааст. Номбурда соли 1916 дар шаҳри Душанбе ба дунё омада, солҳои 1939 — 1977 овозхони дастаи «Шашмақом»-и Кумитаи телевизион ва радиои Тоҷикистон буд.
Саҳми Нериё Аминов дар рушди мусиқии суннатии тоҷикон — Шашмақом басо назаррас аст. Ў бо шеваи фаҳмову возеҳ ва услуби хос анъанаҳои шашмақомхониро идомаю такмил бахшидааст. Дар хазинаи тиллоии радиои тоҷик суруду таронаҳои мавсуф, аз қабили «То боди сабо», Чӣ донӣ, Зулфи парешон, «Гиря», «Хубрўён», «Насруллоӣ», «Шаҳноз», «Даромади ушшоқ» ва ғайра даҳсолаҳост, ки хотири мухлисони ин санъати асилро шод мегардонанд.
Нериё Аминов аз 80 — соли умри бобаракати худ 60 — соли онро дар Тоҷикистон сипарӣ намуда, онро ватани аслиии хеш медонист. Ӯ бо унвонҳои фахрии Артисти хизматнишондодаи РСС Тоҷикистон ва «Ҳофизи халқии Тоҷикистон» қадрдонӣ шудааст.
Хотиррасон менамоем, ки устодони забардасти мусиқии классикии тоҷик, донандагони дурдонаҳои Шашмақом Бобоқул Файзуллоев, Шоҳназар Соҳибов, Фазлиддин Шаҳобов бо мадади ҳамсафону шогирдон Нериё Аминов, Маҷид Ҳомидов, Барно Исҳоқова, Фариза Сайдуллоева, Боймуҳаммад Ниёзов ва дигарон ин дастаи ҳунариро шўҳратёр гардонданд. Бори аввал асарҳои пурраи классикии Шашмақом, ки беш аз 350 оҳангро дар бар мегиранд, соли 1977 дар низоми «Моно» сабт ва ба хазинаи тиллоии радиои тоҷик гузошта шудааст.