Ғолибони 4 гурӯҳи бозиҳои Ҷоми Амрико муайян шуданд

Душанбе, 16.06.2016 /АМИТ «Ховар»/. Дар 4 гурӯҳи бозиҳои Ҷоми Амрико ғолибон муайян шуданд. Аз гурӯҳи «А» дастаҳои мунтахаби ИМА ва Колумбия, аз гурӯҳи«В» Эквадор ва Перу, аз гурӯҳи «С» Мексика ва Венесуэла ва аз гурӯҳи «Д» Аргентина бо Чилӣ ба бозиҳои ¼- ниҳоӣ роҳхат гирифтанд.
Мутаассифона, дастаҳои машҳури Бразилия аз гурӯҳи «В» ва Уругвай аз гурӯҳи «С»  дар силсилаи ин вохӯриҳо ба дастоварде соҳиб нашуда, мусобиқаро тарк гуфтанд. То ҳол ба мухлисон маълум нест, ки чаро нишонзани беҳтарини Чемпионати Испания Луис Суарес (ФК «Барселона»)  дар бозиҳои дастаи мунтахаби Уругвай ширкат наварзид. Ҳарчанд Луис Суарес дар бозии ниҳоии Ҷоми Испания лат бардошта буд, дар нимаи дуввуми вохӯрӣ бо дастаи мунтахаби Венесуэла барои ба майдон омадан омода шуд, аммо сармураббии дастаи мунтахаби Уругвай Оскар Табарес  ӯро ба бозӣ нагузошт. Аз ҷараёни гузориши телевизионӣ аён буд, ки Луис Суарес аз ин норозӣ аст ва бо дастонаш девори ҷои нишасти ҳайатӣ эҳтиётиро муштборон кард. Баъд аз бозӣ дар нишасти матбуотӣ сармураббии дастаи мунтахаби Уругвай Табарес иттилоъ додааст, ки бозингари 100 фоиз омоданабударо ӯ ба майдон роҳ намедиҳад ва духтурон низ ба ӯ тавсия надодаанд.  Дар ин бора Луис Суарес дар кадом андеша аст, касе намедонад.
Ба ҳамин тартиб дар вохӯриҳои ¼- ниҳоӣ ИМА бо Эквадор, Перу бо Колумбия, Аргентина бо Венесуэла ва Мексика бо Чилӣ қувва месанҷанд.