Дар 25 соли соҳибистиқлолӣ зиёда аз 20 нафар зан соҳиби рисолаи докторӣ гардиданд

Душанбе, 02.09.2016. /АМИТ «Ховар»/. Имрӯз дар конфронси ҷумҳуриявии «Саҳми занон дар рушди илм» ноиби президенти Академияи илмҳои Ҷумҳурии Тоҷикистон Муҳиба Ёқубова иброз дошт, ки занон тарбиятгари насли оянда буда, инкишофи насли солим ва маърифатпарвар ба фаъолияти онҳо вобастагии калон дорад.
«Сиёсати имрӯзаи Ҳукумати Ҷумҳурии Тоҷикистон барои аз байн бурдани мушкилот равона шудааст. Ташкил намудани квотаҳо барои духтарони деҳот дар муассисаҳои таҳсилоти олии кишвар боиси он гардидааст, ки духтарони лаёқатманд хоҳиши дар аспирантура давом додани таҳсили худро доранд»,- гуфт ноиби президенти Академияи илмҳо ва ҳамзамон афзуд, ки: «Имрӯз дар аспирантура шумораи чунин духтарон зиёд ба чашм мерасад».
Ба иттилои Муҳиба Ёқубова, дар соли 2000 шумораи аспирантон 22 нафар буд ва дар соли 2015 ин шумора ба 287 нафар расид.
Ҳоло дар сафи аспирантон ва докторантон 106 нафар духтарон таҳсил менамоянд.
Дар 25 соли Истиқлолияти давлатии Ҷумҳурии Тоҷикистон зиёда аз 20 нафар зан соҳиби рисолаи докторӣ ва беш аз 100 нафар соҳиби рисолаи номзадӣ гардиданд.