«Садои Душанбе» — садои сартосарии Тоҷикистон

ДУШАНБЕ, 18.01.2017 /АМИТ «Ховар»/. 18 сол муқаддам дар фазои иттилоотии кишвар падидаи нав рӯйи кор омад. Бо ташаббуси собиқ Раиси Кумитаи телевизион ва радиои назди Ҳуқумати Ҷумҳурии Тоҷикстон Сайф Раҳимзоди Афардӣ 18 январи соли 1999 Радиои «Садои Душанбе» ба фаъолият оғоз кард. Бо вуҷуди пешниҳоди барномаҳои алоҳидаи мустақим дар шабакаҳои дигари Радиои Тоҷикистон, ин ягона шабакае ба ҳисоб мерафт, ки ба муддати 8 соат тамоми барномаҳои худро ба таври мустақим бо ду забон- тоҷикӣ ва русӣ пешниҳоди шунавандагон менамуд. Таъсиси «Садои Душанбе» дар даҳсолаи аввали соҳибистиқлолии Тоҷикистон қадами муҳиме дар рушди ВАО маҳсуб мешуд.
Дар ҳақиқат радио воситаест, ки дар замони муосир ҳамчун як рукни муҳими маънавии ҷомеа эътироф гардида, дар инъикоси воқеоти рўзгор, таҳкими асолати миллӣ, рушди давлатдорӣ, тавсеаи ҷаҳонбинии мардум, пойдории адолат, дўстию рафоқат нақши муассир дорад ва ба афкори ҷомеа таъсири амиқ мерасонад.
Дар Тоҷикистон 10 апрели соли 1930 бори аввал радио ба фаъолият оғоз кардааст. Бо шарофати соҳибистиқлолӣ шумораи радиоҳои давлатию хусусӣ дар Тоҷикистон хеле зиёд гардидаанд, ки мақсади аслии онҳо ғанӣ гардонидани фазои иттилоотии Тоҷикистон бо ахбори ҷолибу созанда ва таъмини фароғату баланд бардоштани маънавиёти мардум мебошад.
Дар ибтидо агарчӣ радиои «Садои Душанбе ҳамчун шабакаи сартосарии «Садои Душанбе» ном бурда мешуд ва аз соати 8-и субҳ то 16-и бегоҳ ба муддати 8 соат мустақиман бо ду забон- тоҷикӣ ва русӣ барнома пешниҳод мекард, айни ҳол пахши барномаҳои он 24 соатро ташкил медиҳад. Яъне то соати 20:00 мустақиман ва сипас пахши такрории он то соати 8-и субҳи рӯзи дигар идома меёбад.