Асо ҳам як замоне шохаи сабз будааст. Намоиши аксҳо бахшида ба Рӯзи ҳифзи муҳити зист
![](https://khovar.tj/wp-content/uploads/2017/05/Namoishi-Surathoi-Navruz-Saidov-1.jpg)
ДУШАНБЕ, 25.05.2017 /АМИТ «Ховар»/. Дирӯз дар Осорхонаи миллии Тоҷикистон бахшида ба Рӯзи байналмилалии гуногунии биологӣ ва Рӯзи умумиҷаҳонии ҳифзи муҳити зист намоиши аксҳо таҳти унвони «Сайёраи сабз» ифтитоҳ гардид.
Тавре хабарнигори АМИТ «Ховар» иттилоъ дод, дар намоиш беш аз 90 сурати аксбардори ҷавон Наврӯз Саидов, ки фарогири табиати тамоми минтақаҳои Тоҷикистонанд, ба маъраз гузошта шуд. Бино ба иттилои Наврӯз Саидов, ин суратҳо дар муддати тӯлонӣ аксбардорӣ шуда, тамоми зинаҳои экосистемаҳои табиии Тоҷикистон- аз биёбон то баландкӯҳҳоро дарбар мегиранд. Як растанӣ бо номи ҷузгун, ки хоси биёбон аст ва дар моҳҳои апрелу май гул мекунаду тамоми биёбонҳоро оро медиҳад, бо маҳорати баланд нишон дода шудааст. Ҳамчунин дар намоиш аксҳо аз минтақаҳои Мурғоб, ки ҳар кадом нозукиву зебоии ба худ хос доранд ва дар онҳо гуногунии фарҳанги миллии мо дарҷ гардидаанд, пешкаши дӯстдорони табиат карда шуд.
Саркотиби Академияи илмҳои Ҷумҳурии Тоҷикистон Абдусаттор Саидов зикр намуд, ки ҳалли масъалаҳои ҳифзи табиат, гуногунии биологӣ, экосистемаҳои табиӣ имрӯз тобиши байналмилалӣ гирифтааст ва яке аз масъалаҳои мубрами ҳамоишҳои сатҳи байналмилалӣ ба ҳисоб меравад. Ҷумҳурии Тоҷикистон бо сарварии Пешвои миллат муҳтарам Эмомалӣ Раҳмон ҳамчун пешоҳанги ҳалли масъалаҳои экологӣ на танҳо дар сатҳи минтақавӣ, балки дар сатҳи байналмилалӣ қарор гирифтааст.
Аз ҷониби Маҷмаи умумии СММ пазируфтани икдоми навбатии Президенти Ҷумҳурии Тоҷикистон ва эълон гардидани Даҳсолаи байналмилалии «Об барои рушди устувор», 2018-2028 далели муътамади ин гуфтаҳост. Мақсади Ташкилоти ҷамъиятии «Сайёраи сабз», ки ташаббускори ин намоиш аст, пайванди наслхо тавассути намоиши аксҳо бо инъикоси гуногунии биологӣ ва фарҳангӣ мебошад.
Тоҷикистон аз ҷиҳати бой будани гуногунии биологӣ ва рангин будани экосистемаҳо дар Осиёи Марказӣ дар ҷои аввал меистад. Дар кишвари мо зиёда аз 13 000 намуди ҳайвонот, беш аз 10 000 намуди растанӣ, аз ҷумла 4550 намуди растаниҳои гулдор паҳн гардидаанд, ки инҳо захираи бебаҳои табиии кишвари мо ба ҳисоб мераванд. Солимии ҷомеа ва некӯаҳволии мардуми он аз ҳолати захираҳои табиӣ вобастагии зич дорад. Гуногунии биологии кишвари мо на танҳо манбаи асосии моддӣ, балки як мавзеи зебоии эстетикӣ ба ҳисоб меравад, ки тамоми сайёҳони хориҷиро ба худ ҷалб мекунад.
«Бояд табиати зебои Тоҷикистони биҳиштосо бо роҳҳои гуногун ташвиқу тарғиб гардад, то барои рушди туризм, ки яке аз соҳаҳои даромаднок ба ҳисоб меравад, мусоидат намояд»,- иброз намуд Абдусаттор Саидов.
Роҳбари Ташкилоти ҷамъиятии «Сайёраи сабз» Комил Саидов гуфт, ки он мушкилоти табиие, ки имрӯз пешорӯи мо меоянд ва ба иқтисодиёту иҷтимоиёти мамлакати мо метавонад таъсири манфӣ расонад, ин тағйир ёфтани экосистемаҳои табиӣ мебошад. Аз худ шудани заминҳо ва зиёд шудани аҳолӣ аввал ба табиат таъсир мерасонад. Яъне ҳангоми маҳв шудани як намуди растанӣ дар табиат мувозинат гум мешавад ва вақте мувозинат гум шуд, ба табиат зарба мезанад. Таъсири ин зарба на танҳо ба табиат, балки ба иқтисодиёт низ мерасад. Бинобар ин ба намоиш гузоштани ин аксҳо ба он хотир аст, ки диққати мардум ба табиат, ба ҳифзи он зиёдтар шавад ва то андозае маҳвшавии олами набототу ҳайвонот пешгирӣ карда шавад. «Мо мехоҳем, ки сайёра сабз бошад, чунки аз сайёраи сабз манбаи ҳастии тамоми мавҷудоти зинда оғоз мешавад»,-илова кард Комил Саидов.
Директори Боғи ботаникии шаҳри Кӯлоб Тилло Бобоев, ки аз намоиш дидан мекард, аз тамошои ин аксҳои баландмазмуну ифодакунандаи фарҳанги миллӣ таассуроти баланд бардошт. «Икдоме, ки имрӯз аз ҷониби ин ҷавонон- Комил ва Наврӯз Саидовҳо гирифта шуд, барои баланд бардоштани маърифати экологӣ ва солимии кишвари мо аҳамияти хосса дорад. Онҳо ба воситаи аксҳо аз мардуми кишвар даъват ба амал овардаанд, ки ба қадри сарватҳои табиӣ бирасем».
Хотиррасон мекунем, ки намоиши «Сайёраи сабз» аз 24 май то 7 июн идома меёбад.
Мавҷуда АНВАРӢ