Б. Ғафуров: таҷлили Рӯзи маъюбон ва эҳдои меҳрубониҳо ба онҳо

ДУШАНБЕ, 08.07.2017 /АМИТ «Ховар»/. Рӯзи маъюбон ва пиронсолон дар ноҳияи Бобоҷон Ғафуров бо иштироки 150 нафар маъюбон бо оростани дастурхони идона ва эҳдои меҳру муҳаббат истиқбол гирифта шуд.

Тавре аз Мақомоти иҷроияи ҳокимияти давлатии ноҳияи Бобоҷон Ғафуров  хабар доданд, дар ҳудуди ноҳия 7 ҳазор нафар шахсони имконияташон маҳдуд зиндагӣ мекунанд, ки  1023 нафарашонро кӯдакону наврасони то синни 18-сола ташкил медиҳанд. Дар арафаи ҳар иду айём ба ин шахсон аз ҷониби мақомоти давлатӣ ва ашхоси саховатманд кумак расонида мешавад.

Ин навбат низ бо ташаббуси мақомоти иҷроияи ҳокимияти давлатии ноҳия ба ин муносибат дар тӯйхонаи «Хестварз» дастурхони идонаю чорабинии фарҳангӣ ташкил карда шуданд.

Раиси ноҳияи Бобоҷон Ғафуров Зариф Назирӣ иброз дошт, ки сазовори ҳама гуна ғамхориву дастгирӣ, фароҳам овардани шароити арзанда  барои маъюбону пиронсолон аз рукнҳои муҳими сиёсати иҷтимоии давлату ҳукумати Тоҷикистон мебошад. Дар роҳи иҷрои дастуру раҳнамоӣ ва дастгириҳои Пешвои миллат муҳтарам Эмомалӣ Раҳмон дар ноҳияи Бобоҷон Ғафуров маъюбону пиронсолон ва ашхоси ниёзманд хамеша таҳти таваҷҷуҳи мақомоти иҷроия қарор доранд.

Дар ҷамъомад баробари дастурхони идона ва тақдими туҳфаҳо аз ҷониби ҳунармандони бахши фарҳанг барномаи фарҳангӣ пешниҳод гардид. Суруду таронаҳо дар васфи Ватан, сулҳу амонӣ ва пойдории Истиқлолияти давлатӣ, ки аз ҷониби маъюбон пешкаши иштирокдорон гардид, ба чорабинӣ ҳусни дигар зам намуд.