“АЗ ДИДА БАСЕ ФАРҚ БУВАД… “. Сайёҳ баъди бозгашт ба Ватан метавонад бо нақли таассуроти худ чанд нафари дигарро шефтаю шайдои Тоҷикистон гардонад

ДУШАНБЕ, 02.04.2018. /АМИТ «Ховар»/. Дар Кумитаи рушди маҳали назди Президенти Ҷумҳурии Тоҷикистон бахшида ба Соли рушди сайёҳӣ ва ҳунарҳои мардумӣ дар Ҷумҳурии Тоҷикистон конфронс баргузор гардид.

Муовини якуми раиси Кумитаи рушди маҳал Бег Қурбонзода изҳор намуд, ки сайёҳӣ яке аз соҳаҳои муҳими бо шуғл фаро гирифтани аҳолии қобили меҳнат, баланд бардоштани сатҳи зиндагии мардум, рушди дигар соҳаҳои хизматрасониву истеҳсолӣ, инчунин муаррифи таъриху фарҳанг, табиат ва анъанаҳои миллӣ ба ҳисоб меравад.

Тавре хабарнигори АМИТ «Ховар» хабар медиҳад, дар кори   конфронс муовини якуми раиси Кумитаи рушди сайёҳии назди Ҳукумати Ҷумҳурии Тоҷикистон Ҳабибулло Амирбекзода, мутахассиси пешбари Раёсати рушди муассисаҳои фарҳангию фароғатӣ ва ҳунарҳои мардумии Вазорати фарҳанги Ҷумҳурии Тоҷикистон Озар Баҳромзода ва кормандони кумита иштирок ва маърӯза намуданд.

«Муҳимтарин роҳи ҷалби сайёҳон ба ин ё он кишвар, пеш аз ҳама, муаррифии таъриху фарҳанги волои ҳамон давлат маҳсуб меёбад. Таъриху фарҳанг ва тамаддуни халқи тоҷик, бешубҳа, ҳунарҳои мардумӣ, санъату фарҳанги миллат ва мавзеъҳои таърихию фарҳангии нотакрори он мебошанд, ки диққати сайёҳони зиёдеро ба худ ҷалб намудаанд. Ин сайёҳон, дар навбати худ баъди бозгашт ба Ватан метавонанд бо нақли таассуроти худ чанд нафари дигарро низ шефтаю шайдои Тоҷикистон гардонанд. Аз ин рӯ ҷалби бештари сайёҳон ба мамлакати кӯҳию зебои мо танҳо бо ба роҳ мондани шароити мувофиқ, хизматрасонии сатҳи баланд ва бо нақлҳои ҷолиб дар хотири онҳо бедор кардани меҳру муҳаббат нисбат ба таъриху тамаддун ва адабиёту санъати тоҷикон сурат мегирад,-иброз дошт Озар Баҳромзода. – Зар тавре яке аз ҷаҳонгардони машҳури миллати тоҷик Камоли Хуҷандӣ навиштааст: «Аз дида басе фарқ бувад то ба шунида…».

Зикр шуд, ки эълон гардидани Соли рушди сайёҳӣ ва ҳунарҳои мардумӣ заминаи хубе барои рушди ҳунарҳои мардумӣ буда, ба беҳтар гардидани шароити зиндагии аҳолии мамлакат мусоидат мекунад.