Дар Душанбе ҷаласаи 28-уми Ассамблеяи генералии Ассотсиатсияи байниминтақавӣ оид ба стандартизатсия оғоз гардид

Июль 10, 2019 10:20

ДУШАНБЕ, 10.07.2019./АМИТ «Ховар»/. Имрӯз дар шаҳри Душанбе ҷаласаи 28-уми Ассамблеяи генералии Ассотсиатсияи байниминтақавӣ оид ба стандартизатсия  ба кори худ шурӯъ кард.

Ҷаласаро директори Агентии «Тоҷикстандарт» Қудрат Давлатзода ифтитоҳ намуд.

Сипас аз номи Ҳукумати Ҷумҳурии Тоҷикистон муовини Сарвазири Ҷумҳурии Тоҷикистон Азим Иброҳим меҳмонон ва иштирокчиёни ҷаласаро хайрамақдам гуфта, фаъолияти босамари Ассотсиатсияи байниминтақавӣ оид ба стандартизатсия ва саҳми онро дар рушди иқтисодии кишварҳои аъзои он нек арзёбӣ кард.

 «Умедворам, ки ҳамгироиву ҳамкории васеи мо ба таъмин намудани рушди иқтисодиву иҷтимоӣ ва дар ин замина, ба пешрафти минбаъдаи кишварҳоямон ҳамаҷониба мусоидат хоҳад кард.  Масъалаҳое, ки дар ҷаласаи навбатӣ оид ба стандартизатсия, метрология, сертификатсия ва аккредитатсия баррасӣ карда мешаванд, боз як саҳифаи наверо дар тавсеаи фаъолияти мо мекушоянд ва барои рушди системаи амалкунанда дар соҳа мусоидат хоҳанд намуд»,- изҳор намуд Азим Иброҳим.

Ҳамзамон Сафири Фавкулода ва Мухтори Ҷумҳурии Туркия дар Тоҷикистон Алӣ Рифат Кёксал, президенти Институти стандартизатсияи Туркия, Раиси Ассотсиатсияи байниминтақавӣ оид ба стандартизатсия, профессор Адем Шаҳин сухан карда,  доир ба раванди ҳамкории судманд ибрози андеша карданд.

Баъд аз қисмати ифтитоҳӣ ҷаласаи 28-уми Ассамблеяи генералӣ тибқи нақша оид ба баррасии масъалаҳои дар рӯзнома муқарраршуда ба кори худ оғоз кард.

Мавриди зикр аст, ки Тоҷикистон имрўз дар  баробари  узвият дар якчанд ташкилотҳои  ҷаҳонӣ, инчунин аъзои Ассотсиатсияи байниминтақавӣ оид ба стандартизатсия (МАС) аст. Узвият дар чунин ташкилоти бонуфузи байналмилалӣ барои таҳкиму рушди минбаъдаи ҷумҳурӣ заминаҳои мусоид фароҳам меорад.

Ассотсиатсияи байниминтақавӣ оид ба стандартизатсия (МАС) бо дарназардошти афзалиятҳои минтақа ба ташаккули низоми шарикии байни кишварҳо ва рушди стратегияи иқтисодии он нигаронида шудааст.

Ёдовар мешавем, ки Ассотсиатсияи байниминтақавӣ оид ба стандартизатсия соли 1991 дар Ҷумҳурии Туркия таъсис дода шуда, айни замон  ба ҳайати он 18 давлат- Тоҷикистон, Россия, Албания, Озарбойҷон, Гурҷистон,  Қазоқистон, Қирғизистон, Муғулистон, Молдова, Ӯзбекистон, Туркия, Туркманистон ва ғайраҳо шомиланд.

Тибқи таҳлилҳо, ҳамкорие, ки якчанд сол инҷониб дар доираи узвият ба Ассотсиатсияи байниминтақавӣ идома доранд, барои бозомӯзии мутахассисони касбӣ, бартараф намудани монеаҳои техникӣ дар савдои байналмилалӣ, рушди соҳаи стандартонӣ ва дар ин замина ҳамоҳангсозии стандартҳои байнидавлатӣ ба стандартҳои байналмилалӣ ва зиёд намудани ҳаҷми маҳсулоти содиротии рақобатпазир дар Ҷумҳурии Тоҷикистон замина гузоштаанд.

Ҳамоҳангсозии стандартҳои миллӣ ба стандартҳои байналмилалӣ, таҳия ва амалӣ намудани дастурҳои техникии  мувофиқашуда  аз рӯи принсипҳои Созмони Умумиҷаҳонии Савдо, ки имрӯз Тоҷикистон узви он низ мебошад, барои бартараф намудани монеаҳо ва маҳдудият дар муомилоти озоди мол, кор ва хизматрасонӣ мусоидат менамояд.

Июль 10, 2019 10:20

Хабарҳои дигари ин бахш

Султон Раҳимзода ҷониби Қазоқистонро барои иштирок дар Форуми байналмилалии сармоягузории «Душанбе-Инвест 2025» даъват намуд
Хадамоти гумруки Тоҷикистон: дар содироти молҳои ватанӣ вазни қиёсии асосиро сурма ва маҳсулоти он дар ҳаҷми 30,4 фоиз ташкил медиҳад
Ҳаҷми Маҷмуи маҳсулоти дохилии ноҳияи Ёвон ба беш аз 1,5 миллиард сомонӣ расид
Дар Остона ҷаласаи 19-уми Комиссияи байниҳукуматии Тоҷикистону Қазоқистон оид ба ҳамкории иқтисодӣ доир шуд
НИШАСТИ МАТБУОТӢ. Нақшаи воридоти андозҳо ва дигар пардохтҳои ҳатмӣ ба андозаи 113,7 фоиз иҷро гардид
НИШАСТИ МАТБУОТӢ. Ҳаҷми умумии даромади буҷети давлатӣ 111,5 фоиз иҷро гардид
НИШАСТИ МАТБУОТӢ. Маҷмуи маҳсулоти минтақавии вилояти Хатлон ба 17,1 миллиард сомонӣ расид
Нақшаи ҷамъоварии пардохтҳои гумрукӣ дар Тоҷикистон дар сатҳи 112,2 фоиз таъмин гардид
НИШАСТИ МАТБУОТӢ. Дар шашмоҳаи якуми соли 2025 зиёда аз ҳазор ҳолати ҳуқуқвайронкунии маъмурии алоқаманд ба коррупсия ошкор карда шуд
Соҳибкорони бурунмарзӣ барои иштирок дар Форуми байналмилалии сармоягузории «Dushanbe Invest–2025» даъват шуданд
Байни Палатаи савдо ва саноати Тоҷикистон ва Ассотсиатсияи саноат ва тиҷорати Синҷон‑Уйғури Чин Ёддошти тафоҳуми ҳамкорӣ ба имзо расид
Масъалаи ифтитоҳи парвозҳои нав байни шаҳрҳои Тоҷикистон ва Туркия баррасӣ шуд