Ба Агентии омор барои гузаронидани барӯйхатгирии аҳолӣ ва фонди манзил 337 планшет тақдим гардид

ДУШАНБЕ, 27.12.2019. /АМИТ «Ховар»/. Имрӯз, 27 декабр аз ҷониби Хазинаи нуфуз ва намояндагии Комиссари олии СММ дар умури паноҳандагон дар Ҷумҳурии Тоҷикистон ба Агентии омори назди Президенти Ҷумҳурии Тоҷикистон барои гузаронидани барӯйхатгирии аҳолӣ ва фонди манзил 337 планшет тақдим гардид. Ин нуктаро имрӯз дар ҷаласаи навбатии омодагӣ ба маъракаи муҳими сиёсӣ — Барӯйхатгирии аҳолӣ    ва фонди манзили  Ҷумҳурии Тоҷикистон дар соли 2020 директори Агентии омори назди Президенти Ҷумҳурии Тоҷикистон  Гулнора Ҳасанзода иброз намуд.

Бино ба маълумоти номбурда, планшетҳои мазкур дар оянда, баъди  барӯйхатгирии аҳолӣ барои тадқиқоти оморӣ истифода хоҳанд шуд.

Гулнора Ҳасанзода дар идома зикр кард, ки масъалаи барӯйхатгирии аҳолӣ    ва фонди манзил дар Паёми солонаи Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон 26 декабри соли 2019 таъкид гардид.

Агентии омор барои дар сатҳи байналмилалӣ гузаронидани ин чорабинии умумиҷаҳонӣ Барномаи барӯйхатгирии аҳолӣ ва фонди манзили Ҷумҳурии Тоҷикистон дар соли 2020-ро тибқи стандартҳои байналмилалӣ бо назардошти тавсияҳо омода намуд.

Дар айни замон корҳои тайёр намудани «Дастурамал дар бораи тартиби гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020» идома дорад.

Соли равон бо дастгирии молиявии намояндагии Хазинаи нуфузи СММ дар Ҷумҳурии Тоҷикистон барои 121 нафар кормандони барӯйхатгирии аҳолии вилоятҳо ва шаҳру ноҳияҳои тобеи марказ дар шаҳрҳои Хуҷанд, Бохтар, Хоруғ ва шаҳри Турсунзода дастурдиҳии омӯзишӣ дар мавзӯи «Рафти корҳои тайёрӣ ва тартиби гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020» гузаронида шуд.

Ҳамзамон бо дастгирии молиявии ташкилоти зикршуда ва кумаки техникии Агентии омор дар мавзӯи «Ҷамъоварии маълумот бо истифода аз таҷҳизоти мобилӣ» барои кормандони мақомоти омори Тоҷикистон ва ИДМ дар сатҳи байналмилалӣ дастурдиҳии омӯзишӣ гузаронида шуд.

Ғайр аз ин бо дастгирии молиявии ин созмон 9 нафар мутахассисони мақомоти омор  дар ҷумҳуриҳои Қазоқистон, Беларус ва Ӯзбекистон     табодули таҷриба намуданд.

Барӯйхатгирии аҳолӣ    ва фонди манзили  Ҷумҳурии Тоҷикистон соли 2020   тақрибан 10-15 рӯз идома ёфта, пурсишҳо бо се усул, яъне пур карани варақаҳои барӯйхатгирӣ бо истифода аз сомонаи интернетӣ, истифода аз планшет дар ҳамаи маҳалҳои шаҳрии ҳудуди ҷумҳурӣ ва бо усули анъанавӣ пур кардани саволномаҳо дар варақаҳо дар маҳалҳои деҳот истифода мешаванд.

Ҷумҳурии Тоҷикистон дар қатори дигар мамолики пешрафтаи ҷаҳон ба марҳилаи навбатии барӯйхатгирии аҳолӣ, ки соли 2020 рост меояд, ҳамроҳ шуд.  Масъалаи мазкур ҳамчунин дар шаҳри Бишкек 16 сентябри соли равон дар ҷаласаи навбатии Шӯрои сарони давлатҳои ИДМ ҷонибдорӣ карда шуд.

Ҷаласаи навбатии омодагӣ ба Барӯйхатгирии аҳолӣ    ва фонди манзили  Ҷумҳурии Тоҷикистон дар соли 2020 дар толори Агентӣ доир гардида, дар он кормандони Агентии омор ва намояндагони Хазинаи нуфуз ва намояндагии Комиссари олии СММ дар умури паноҳандагон дар Ҷумҳурии Тоҷикистон, инчунин вазорату идораҳои дахлдор иштирок намуданд.

Мавриди зикр аст, ки барӯйхатгирии аҳолӣ маъракаи муҳими давлатию сиёсӣ арзёбӣ гардида, натиҷаҳои он маҳз барои таҳияи стратегияи барномаҳои миллӣ ва минтақавӣ, баҳодиҳии вазъи демографию иҷтимоии аҳолӣ ва сатҳи некуаҳволии аҳолии мамлакат нақши муҳим дорад.

Мавҷуда АНВАРӢ,
АМИТ «Ховар»