Дар Тоҷикистон шумораи соҳибкорон зиёд мегардад

ДУШАНБЕ, 22.01.2020 /АМИТ «Ховар»/. Соли 2019 нисбат ба соли 2018 шумораи соҳибкорони инфиродӣ 35,2 ҳазор (6,7%) зиёд шудааст, аз ҷумла 4 ҳазори он  (5,4%) соҳибкори инфиродӣ  мебошанд, ки  тибқи шаҳодатнома кор мекунанд, 2,3 ҳазор (7,9%) соҳибкори инфиродӣ  бо иҷозатнома  кор карда, 7,8 ҳазор хоҷагии деҳқонӣ  фаъолият доранд. Дар ин бора аз Агентии омори назди Президенти Ҷумҳурии Тоҷикистон иттилоъ доданд. 

Баробар ба 1 январи соли 2020 дар ҷумҳурӣ  ҳамагӣ  561,3 ҳазор нафар соҳибкори инфиродӣ  ба қайд  гирифта шудаанд, ки аз онҳо 78,5 ҳазор  соҳибкори инфиродӣ бо шаҳодатнома,  319,1  ҳазор тибқи  иҷозатнома  фаъолият доранд. Инчунин 163,7 ҳазор хоҷагии деҳқонӣ қайд гардиданд.

«Аз шумораи умумии соҳибкорони  инфиродии қайдшуда дар моҳҳои январ-декабри соли 2019 24,4 ҳазор нафар соҳибкори  инфиродӣ корро қатъ кардаанд, ки аз инҳо 3 ҳазор нафар тибқи шаҳодатнома ва 19,4 ҳазор бо иҷозатнома кор менамуданд. 2 ҳазори он  хоҷагии деҳқонӣ буданд»,- хабар медиҳад  манбаъ.

Қобили зикр аст, ки  шумораи соҳибкорони фаъолиятдошта то 1 январи соли 2020  295, 5  ҳазор нафарро ташкил медиҳад, аз  ҷумла 34, 6  ҳазор нафар соҳибкори инфиродие, ки мутобиқи шаҳодатнома,  105, 3 ҳазор соҳибкори инфиродӣ бо иҷозатнома  ва 155, 6 ҳазор  хоҷагии деҳқонӣ фаъолият мебаранд.  Дар қиёс бо  ҳамин давраи соли гузашта шумораи соҳибкорони инфиродии фаъолиятдошта 10,8 ҳазор (3,8%) зиёд гаштааст,  аз ҷумла 1 ҳазор (3,1%) соҳибкори инфиродӣ, ки  бо шаҳодатнома, 3,9 ҳазор (3,9%) соҳибкори инфиродӣ бо иҷозатнома фаъолият дошта, 5,8 ҳазораш (3,9%) хоҷагии деҳқонӣ мебошанд.