«Саноии Ғазнавӣ ва таҳаввули адабиёти тасаввуфӣ», таҳти ин ном дар Душанбе конференсияи ҷумҳуриявӣ доир шуд

ДУШАНБЕ, 28.11.2020. /АМИТ «Ховар»/. Дар Донишгоҳи миллии Тоҷикистон 27 ноябр Конференсияи ҷумҳуриявии «Саноии Ғазнавӣ ва таҳаввули адабиёти тасаввуфӣ» баргузор шуд, хабар медиҳад АМИТ «Ховар».

Ҷаласаи ифтитоҳии конференсия бо ҳузури муҳаққиқону устодони донишгоҳҳо ва Академияи миллии илмҳои Тоҷикистон, меҳмонон ва донишҷӯён дар толори калони шаҳраки донишҷӯёни ДМТ гузашт.

Дар конференсия олимону коршиносони соҳа дар мавзӯъҳои саноишиносӣ дар Тоҷикистон ва ҷаҳон, таҳқиқ ва нашри осори адабӣ ва ирфонии Саноӣ, ҷойгоҳи ӯ дар ташаккули адабиёти ирфонии форсии тоҷикӣ, мушкилоти матншиносӣ ва роҳҳои ҳаллу фасли онҳо ибрози андеша намуданд.

Ба муносибати Конференсияи ҷумҳуриявии «Саноии Ғазнавӣ ва таҳаввули адабиёти тасаввуфӣ» маҷмӯаи мақолаҳои илмии муҳаққиқони тоҷик ва хориҷӣ ва маҷмӯаи мақолаҳои доктори илмҳои филологӣ – саноишиноси шинохта Мирзо Солеҳов бо унвони «Ҷусторҳо дар саноишиносӣ» мунташир шуданд.