Дар гармхонаҳои гулпарварии Турсунзода 300 ҳазор бех гулҳои мавсимӣ парвариш меёбанд

ДУШАНБЕ, 29.01.2021. /АМИТ «Ховар»/. Бо мақсади сазовор пешвоз гирифтани ҷашни 30-солагии Истиқлоли давлатии Ҷумҳурии Тоҷикистон дар шаҳри Турсунзода корҳои созандагию  хуррамгардонӣ бо маром идома дошта, айни ҳол дар гармхонаҳои гулпарварии Муассисаи манзилию коммуналии шаҳр  300 ҳазор бех гулҳои мавсимӣ, аз қабили тагес, виола, петуния, салвия, 140 ҳазор бех қаламчаи гули садбарг ва  зиёда аз 100 ҳазор гули лола  парвариш  ёфта истодаанд.

Тавре аз мақомоти иҷроияи ҳокимияти давлатии шаҳри Турсунзода ба АМИТ “Ховар” хабар доданд, раиси шаҳр Парвиз  Акрамзода аз гармхонаҳои гулпарварӣ дидан намуда,  бо  ҳолати сабзиши онҳо шинос шуд. Номбурда   ба масъулин  супориш дод, ки ҷиҳати тибқи талаботи агротехникӣ  ба роҳ мондани парвариши гулҳо, инчунин сабзу хуррам гардонидани шаҳр тадбирҳои зарурӣ андешанд.

Мавриди зикр аст, ки дар баробари ин, ҷиҳати хуррамгардонӣ, тозагии муҳити зист ва баланд бардоштани маърифати экологии сокинон дар назди корхонаву ташкилот ва муассисаву хоҷагиҳои шаҳр гармхонаҳои хурди гулпарварӣ бунёд гардида, нигоҳубин ва сабзиши гулҳо таҳти назорати доимии мутахассисони шуъбаи ҳифзи муҳити зисти шаҳр қарор доранд.