Робитаҳои байнипарлумонии Тоҷикистону Эрон густариш меёбанд

Сентябрь 17, 2021 18:28

ДУШАНБЕ, 17.09.2021. /АМИТ «Ховар»/. Имрӯз Раиси комиссияи одоби вакилони Маҷлиси намояндагони Маҷлиси Олии Ҷумҳурии Тоҷикистон, Раиси гурӯҳи дӯстии Маҷлиси намояндагон Файзулло Баротзода бо Раиси гурӯҳи дӯстии байнипарлумонии Маҷлиси Шӯрои исломии Ҷумҳурии Исломии Эрон бо гурӯҳи дӯстии Маҷлиси намояндагони Тоҷикистон Ҷалил Раҳимӣ Ҷаҳонободӣ мулоқот намуд.

Тавре котиби матбуотии Маҷлиси намояндагон Муҳамадато Султонов ба АМИТ «Ховар» иттилоъ дод, Раиси комиссияи одоби вакилони Маҷлиси намояндагон  сафари ҳайати расмии Ҷумҳурии Исломии Эрон ба Тоҷикистонро барои тақвияти муносиботи дӯстонаи ду кишвари ҳамзабон муҳим арзёбӣ намуда, таъкид кард, ки ҷониби Тоҷикистон аз ташрифи дӯстони ҳамзабони худ ба кишвари хеш самимона истиқбол менамояд.

«Бояд гуфта шавад, ки зарурати роҳандозӣ ва тавсеаи ҳамкории байнипарлумонӣ миёни Тоҷикистон ва Эрон борҳо дар вохӯриҳои сатҳи баланд миёни роҳбарони олии сиёсии Тоҷикистону Эрон, инчунин дар сатҳи машваратҳои сиёсӣ байни вазоратҳои корҳои хориҷии ҳар ду кишвар муҳокима гардида буданд ва натиҷаҳои дилхоҳ ҳам ба даст омадааст”-таъкид намуд Файзулло Баротзода.

Дар ҷараёни мулоқот масъалаҳои марбут ба тақвияти ҳамкориҳои байни Ҷумҳурии Тоҷикистон ва Ҷумҳурии Исломии Эрон мавриди баррасӣ қарор гирифтанд.

Робитаҳои байнипорлумонии Тоҷикис­тон ва Эрон, -гуфт Файзулло Баротзода,-  дар доираи ҳамкориҳои бисёрҷониба барқарор шудаанд. Миёни Маҷлиси намояндагони Маҷлиси Олии Ҷумҳурии Тоҷикистон ва Маҷлиси Шӯрои Исломии Ҷумҳурии Исломии Эрон  “Гурӯҳи дӯстӣ”-и байнипорлумонӣ амал менамояд. Сафари аъзои гурӯҳҳои дӯстии байнипорлумонии ҳарду кишвар ҷиҳати шиносоӣ бо фаъолияти гуногунҷабҳаи парламентҳо, боздиди онҳо аз мавзеъҳои таърихию фарҳангӣ, инчунин дидору мулоқот бо роҳбарони вазорату идораҳои ҳарду ҷониб анҷом гирифтаанд.

Мавсуф доштани таърих, забон, фарҳанг ва ойини муштарак байни миллатҳои тоҷику эрониро яке аз омилҳои асосии густариши муносиботи ду кишвар дар ҳамаи заминаҳо арзёбӣ кард. Тазаккур дода шуд, ки фарҳангу тамаддуни миллати тоҷику эронӣ тайи қарнҳои гузашта тамоми дунёро фаро гирифта буд ва имрӯз низ ин тамаддуну фарҳанг тавассути ворисони нобиғагони ин миллатҳо ба дунёи муосир муаррифӣ мешавад.

Файзулло Баротзода табодули таҷриба дар соҳаи илму фарҳанг байни аҳли илму адаби ҳарду миллатро омили муҳими таҳкими муносиботи илмиву фарҳангӣ миёни Тоҷикистону Эрон маънидод карда, таъкид дошт, ки намояндагони илму адаби миллатҳои мо ҳанӯз аз замонҳои хеле қадим байни якдигар мукотиба ва табодули таҷрибаро ба роҳ монда буданд.

Дар мулоқот ҳамчунин таъкид гардид, ки муносибатҳои иқтисодии Ҷумҳурии Тоҷикистон ва Ҷумҳурии Исломии Эрон, ки аз таърихи соҳибистиқлол шудани ҷумҳурии мо оғоз гирифтааст, соҳаҳои мухталифи фаъолиятҳои иқтисодию тиҷоратиро фаро мегиранд.

«Барои пешбурду ривоҷи ҳамкориҳои ҳамаҷониба байни Тоҷикистону Эрон тамоми асосҳои ҳуқуқӣ фароҳам оварда шудаанд, дар ин самт санадҳои зиёди танзимкунандаи ҳамкориҳои дуҷониба ба имзо расидаанд, ки ҳамкориҳоро дар соҳаҳои сиёсат, иқтисод, фарҳангро дар бар мегиранд», — гуфт Раиси комиссияи одоби вакилони Маҷлиси намояндагони Маҷлиси Олии Ҷумҳурии Тоҷикистон Файзулло Баротзода.

Дар мулоқот ҳамчунин таъкид шуд, ки дипломатияи  парлумонӣ дар баробари дипломатияи анъанавӣ дар таҳким ва тавсеаи робитаҳои дуҷонибаи Тоҷикисто­ну Эрон ҷойгоҳ ва саҳми боризи худро дорад. Гурӯҳҳои дӯстии парлумонӣ байни Ҷумҳурии Тоҷикистон ва Ҷумҳурии Исломии Эрон дар фаъолияти худ ин рисолатро ба ваҷҳи писандида анҷом хоҳанд дод.

Акс аз Маҷлиси намояндагони Маҷлиси Олии ҶТ

Сентябрь 17, 2021 18:28

Хабарҳои дигари ин бахш

Вакилони Маҷлиси намояндагон дар кори комиссияҳои Ассамблеяи байнипарлумонии ИДМ иштирок намуданд
Ба қонунҳо «Дар бораи санадҳои меъёрии ҳуқуқӣ» ва «Дар бораи ветеранҳо» тағйиру иловаҳо ворид шуданд
Дилрабо Мансурӣ дар Анҷумани сеюми занони Авруосиё доир ба нақши занон дар рушди дипломатияи сулҳ ва боварӣ сухан гуфт
Чин ба Тоҷикистон дар ҳаҷми 800 миллион юани чинӣ кумаки бебозгашт пешниҳод намудааст
Миёни Маҷлиси намояндагони Маҷлиси Олии Ҷумҳурии Тоҷикистон ва Маҷлиси Бузурги миллии Туркия Протокол оид ба ҳамкории байнипарламентӣ ба имзо расид
Раиси Маҷлиси намояндагони Маҷлиси Олии Тоҷикистон Маҳмадтоир Зокирзода бо Раиси Маҷлиси Бузурги Миллии Туркия Мустафо Шентоп мулоқот намуд
Раиси Маҷлиси намояндагон Маҳмадтоир Зокирзода бо Президенти Туркия Реҷеп Тайип Эрдуғон мулоқот намуд
Маҳмадтоир Зокирзода бо Вазири корҳои хориҷии Ҷумҳурии Туркия Мавлуд Човушоғлу мулоқот намуд
Маҳмадтоир Зокирзода бо роҳбари гурӯҳи дӯстии байнипарлумонии Туркия-Тоҷикистон Аҳмед Узер мулоқот намуд
Ҳайати парлумонии Маҷлиси намояндагон таҳти раёсати Маҳмадтоир Зокирзода ба Ҷумҳурии Туркия сафар намуд
Ҷавобгарӣ барои қонунвайронкунӣ аз тарафи пиёдагардон пурзӯр мегардад
Дилрабо Мансурӣ: Баробарии марду зан ҳуқуқи асосии инсон ва омили муҳими рушди устувор мебошад