АЗ СӮХТОР ЭҲТИЁТ БОШЕД! Сокини Душанбе Ҳабибулло Ҳайдаров ҳуҷраҳои зисти ба талаботи бехатарӣ аз сӯхтор ҷавобгӯ набударо ба иҷора додааст

Декабрь 3, 2021 10:58

ДУШАНБЕ, 03.12.2021 /АМИТ «Ховар»/. Дар кӯчаи Крупскаяи ноҳияи Фирдавсии шаҳри Душанбе аз ҷониби  кормандони Хадамоти давлатии оташнишонӣ корҳои мақсадноки зиддисӯхторӣ доир шуданд, ки зимни онҳо ҳолати қоидавайронкуниҳо аз ҷониби сокинон ошкор гардид, хабар медиҳад АМИТ «Ховар» бо истинод ба Вазорати корҳои дохилии Ҷумҳурии Тоҷикистон.

Зимни санҷиш муайян гардид, ки соҳибхонаи №2 шаҳрванд Ҳабибулло Ҳайдаров манзили истиқоматии худро бе тартиб додани ҳуҷҷатҳои дахлдор ба шаҳрвандон ба иҷора додааст. Вале ҳуҷраҳои зист ба талаботи бехатарӣ аз сӯхтор ҷавобгӯ набуда, пайвасти кабелу ноқилҳои барқӣ дар онҳо урёну овезон буда, барои гарм кардани ҳуҷраҳо иҷоранишинон аз ҳар гуна асбобу таҷҳизоти барқии худсохт васеъ истифода мебаранд. Ин амали онҳо дар баробари масрафи барзиёди неруи барқ метавонад ҳар лаҳза ҳодисаи нохуши сӯхтор ба миён оварад.

Ба ҳамин монанд дар кӯчаи Буни Ҳисорак №№118 ва 119-и ноҳияи Синои пойтахт аз тарафи шаҳрванд Нураҳмад Худойдодов 38 ҳуҷраи манзили истиқоматӣ ба шаҳрвандон бе ҳуҷҷатҳои дахлдор ба иҷора дода шудааст, ки дар онҳо низ одитарин талаботи қоидаҳои бехатарӣ аз сӯхтор риоя карда намешаванд. Аз ҷумла, кабелу ноқилҳои барқӣ урёну овезон буда, аз фурӯзонакҳои тафсон фаровон истифода бурда мешавад. Инчунин барои муътадил намудани ҳарорати ҳуҷраҳои зист ва омода намудани хӯрок иҷоранишинон аз ҳар гуна асбобу таҷҳизоти барқии садамавӣ васеъ истифода менамоянд, ки чунин беэътиноӣ эҳтимоли ба амал омадани сӯхтор ва таҳдид ба ҳаёту саломатии худи онҳоро дар пай дорад.
Бинобар ин, аз тарафи кормандони Хадамоти давлатии оташнишонӣ нисбат ба соҳибхонаҳо парвандаи ҳуқуқвайронкунии маъмурӣ тартиб дода шуда, барои бартараф кардани камбудиҳо муҳлат муқаррар карда шуд.

Кор дар ин самт аз тарафи кормандони Сарраёсати хадамоти давлатии оташнишонии ВКД ва ҷузъу томҳои он дар тамоми шаҳру ноҳияҳои ҷумҳурӣ идома дорад.

Дар фасли сармо эҳтиёҷ ба гармӣ зиёд гардида,  афзоиши истифодаи ҳар гуна асбобу таҷҳизоти гармидиҳандаи барқию газӣ, инчунин печҳои гуногуни аловӣ дар манзилҳои истиқоматии шаҳрвандон ва муассисаву иншооти мухталиф ба назар мерасад.

Вобаста ба ин, дар асоси талаботи Вазорати корҳои дохилӣ баҳри дар амал татбиқ намудани Қарори Ҳукумати Ҷумҳурии Тоҷикистон «Дар барои сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2021-2022» аз тарафи кормандони Сарраёсати хадамоти давлатии оташнишонӣ ва ҷузъу томҳои он дар муассисаву ташкилот, корхонаву иншооти мухталифи шакли моликияту мансубияташон гуногун ва маҳаллаҳои аҳолинишину манзилҳои истиқоматии ҳудуди пойтахт ва тамоми шаҳру ноҳияҳои ҷумҳурӣ корҳои пешгирӣ-оташнишонӣ ва фаҳмондадиҳӣ-омӯзишӣ ба роҳ монда шудаанд.

 АКС: ВКД ҶТ

Декабрь 3, 2021 10:58

Хабарҳои дигари ин бахш

Эмомалӣ Раҳмон: «Раванди таъмини сохторҳои низомӣ ва мақомоти ҳифзи ҳуқуқ бо беҳтарин шароиту имконият минбаъд низ идома меёбад»
Дар ноҳияи Мастчоҳ ба ифтихори Рӯзи Қувваҳои Мусаллаҳ афсарону сарбозони фаъолро ҳавасманд намуданд
РӮЗИ ҚУВВАҲОИ МУСАЛЛАҲ. Роҳбарият ва намояндагони шаҳри Ҳисор ба дидорбинии сарбозону афсарон рафтанд
Имрӯз дар Тоҷикистон ҳавои тағйирёбанда мешавад
РӮЗИ ДИЛОВАРОНИ ШУҶОИ ВАТАН. Дар Донишкадаи кӯҳию металлургии Тоҷикистон 31-солагии таъсиси Қувваҳои Мусаллаҳ таҷлил гардид
ШАҲРВАНДОНИ КОМИЛҲУҚУҚ. Ба 1152 хатмкунандаи муассисаҳои таълимии ноҳияи Восеъ шиноснома дода шуд
Финляндия дар бораи эпидемияи вирус байни кӯдакони хурд хабар додааст
Дар «Тоҷикфилм» Рӯзи Қувваҳои Мусаллаҳи Ҷумҳурии Тоҷикистонро таҷлил намуданд
МЕВАҲОИ ИСТИҚЛОЛ. Намоиш-фурӯши корҳои эҷодии донишҷӯёни Донишгоҳи давлатии Хуҷанд доир шуд
Дар Венесуэла 15 нафар ҳангоми фурӯрезии кон ба ҳалокат расид
Дар якчанд минтақаи Чин бо сабаби барфу боронҳои шадид низоми вокуниши изтирорӣ фаъол шудааст
«КИТОБҲО БАРОИ МУҲОФИЗОНИ ВАТАН». Дар доираи ин ташаббус ба афсарону сарбозон зиёда аз 200 китоб тақдим гардид