«Бонки Эсхата» ва БАТР ба рушди соҳибкории занон дар Тоҷикистон мусоидат мекунанд

Декабрь 21, 2021 10:14

ДУШАНБЕ, 21.12.2021. /АМИТ «Ховар»/. 20 декабр дар ҶСК «Бонки Эсхата» дар доираи барномаи «Занҳо дар тиҷорат», ки дар шарикӣ бо Бонки Аврупоии Таҷдид ва Рушд (БАТР) амалӣ мегардад, бо занони соҳибкор мулоқот доир шуд, хабар медиҳад АМИТ «Ховар» бо истинод ба «Бонки Эсхата».

Барнома ба занони соҳибкор тавассути фароҳам овардани дастрасӣ ба дастгирии молиявӣ ва технологӣ, ки барои пешрафти тиҷорат заруранд, мусоидат мекунад.

Дар ин мулоқот беш аз 30 нафар занони соҳибкор ва дигар меҳмонон аз вилояти Суғд ширкат варзиданд.

Узви Раёсати «Бонки Эсхата» Заррина Ғаниева доир ба ҳадафи баргузории мулоқот изҳори андеша кард.

Дар мулоқот иштирокдорон, аз ҷумла раиси ҶДММ «Аудит Консалтинг» Шӯҳрат Хоҷаев ва ҳуқуқшиноси бонк Камолҷон Ғафуров машваратҳои ҳуқуқӣ доданд. Намояндагони БАТР Малика Абдулвасиева ва Нигора Давлатова дар бораи барномаи «Занҳо дар тиҷорат» сухан гуфта, бартарӣ ва имконияти ин барномаро ба ҳозирин муаррифӣ карданд.

Яке аз лаҳзаҳои ҷолиб баромади соҳибкорзани муваффақи соҳаи маориф Умеда Гадайбоева буд, ки маркази забономӯзии «Аркон»-ро таъсис додааст. Ӯ оид ба таърихи таъсиси фаъолияти соҳибкорӣ, оид ба мушкилиҳое, ки рӯбарӯ шуда буд ва чӣ гуна он монеаҳоро паси сар карда, яке аз марказҳои маъруф ва муваффақи омӯзиши забонҳои хориҷиро таъсис дод, нақл кард.

Дар охир аз ҷониби ташкилкунандагони вохӯрӣ лотерея гузаронида шуда, ғолибон аз ҷониби «Бонки Эсхата» туҳфаҳои хотиравӣ ва сипоснома барои иштироки фаъолона гирифтанд.

Нақши занҳо дар зиндагӣ ва тиҷорат торафт афзуда, инкишоф меёбад. Муносибати масъулиятнок ба тиҷорат барои ноил шудан ба муваффақият, рушди доимии худ, густариши дониш ва малакаи корӣ ба занони соҳибкор барои муваффақ шудан кумак мекунад. Танҳо занҳои фаъол, пурғайрат ва соҳибмаълумот ба худ боварӣ пайдо карда, дар фаъолияти худ далерона пеш рафта метавонанд. Барномаи «Занҳо дар тиҷорат» аз ҷумлаи барномаҳое мебошад, ки ба пешрафти тиҷорати занони соҳибкори тоҷик мусоидат мекунад.

Муяссара Сатторова, мизоҷи ҶСК «Бонки Эсхата» бонуи соҳибкори муваффақ аст. Муяссара тавонист, ки тиҷорати шахсии худро ба роҳ монад ва дар Хуҷанд сехи қаннодии «Маҳина»-ро кушод. Имрӯзҳо ба маҳсулоти ин коргоҳ талабот зиёд буда, мизоҷон таъми махсус ва сифати маҳсулоти қаннодиро зикр мекунанд.

«Зиёда аз 10 сол боз дар ин соҳа кор мекунам. Бо мурури замон хоҳишмандони харидории маҳсулоти ман зиёд шуданд, фурсати васеъ намудани тиҷоратам фаро расид ва ман аз «Бонки Эсхата» дар намуди қарзи имтиёзнок кумаки молиявӣ ва машварату омӯзиши ройгон гирифтам, ки ба шарофати он фаъолияти худро васеъ ва муваффақ намудам. 3 сол мешавад, ки маҳсулоти сехи қаннодии ман миёни  мизоҷонам серталаб аст”,- зикр кард Муяссара Сатторова дар назди занони соҳибкор.

Барномаи “Занҳо дар тиҷорат” бори нахуст моҳи сентябри соли 2017 дар Тоҷикистон аз ҷониби БАТР роҳандозӣ шуда, Бонки Эсхата аввалин шарики ҳамин барнома гардид, ки ба маблағи 1 млн. доллари ИМА маблағгузорӣ карда шуд. Пас аз татбиқи бомуваффақият бонк бо дастгирии БАТР ба узвияти барномаи «Занҳо дар тиҷорат» дар Осиёи Марказӣ шомил шуда, ба маблағи 2 миллион доллар созишнома ба имзо расонид, ки дар доираи он аллакай ба пешниҳоди маблағи қарз барои дастгирии соҳибкории занон шурӯъ кард.

Бонк то имрӯз маҳсулоти қарзии «Имкон»-ро, ки махсус дар доираи барномаи «Занҳо дар тиҷорат» таҳия шудааст, бомуваффақият амалӣ менамояд. Ҳаҷми қарзҳои пешниҳодшуда барои дастгирии соҳибкории занон беш аз 100 млн сомониро ташкил медиҳад. Дар ин самт бонк зиёда аз 1800 нафар бонувонро дастгирӣ намудааст.

АКСҲО аз «Бонки Эсхата»

Декабрь 21, 2021 10:14

Хабарҳои дигари ин бахш

ҚУРБИ АСЪОР: дар Тоҷикистон 1 евро аз 11.1190 то 11.2000 сомонӣ муқаррар карда шудааст
НИШАСТИ МАТБУОТӢ. Дар низоми бонкии Бадахшон ҳисоббаробаркуниҳои ғайрнақдӣ вусъат меёбанд
«Саноатсодиротбонк» ва Актиф Бонки Туркия масъалаҳои ҳамкории дуҷонибаро баррасӣ намуданд
Бонки миллии Тоҷикистон ва Дафтари Швейтсария оид ба ҳамкории иқтисодӣ самтҳои афзалиятнокро баррасӣ карданд
ҚУРБИ АСЪОР: дар Тоҷикистон 1 доллари ШМА аз 10.3357 то 10.3400 сомонӣ муқаррар карда шудааст
«Амонатбонк» ба муштариён беш аз 10 миллион сомонӣ қарзҳои ипотекӣ пешниҳод намудааст
ҚУРБИ АСЪОР: дар Тоҷикистон рубли русӣ аз 0.1450 то 0.1441 сомонӣ муқаррар карда шудааст
«Амонатбонк» соли сипаригардида ба муштариён беш аз 1,4 миллиард сомонӣ қарз пешниҳод намуд
Мансур Мухтар: «Бонки исломии рушд раванди маблағгузориро ба лоиҳаҳои афзалиятнок дар Тоҷикистон идома медиҳад»
Дороиҳои «Амонатбонк» 42,8 фоиз афзоиш ёфтаанд
ҚУРБИ АСЪОР: дар Тоҷикистон 1 доллари ШМА аз 10.3151 то 10.3300 сомониро ташкил медиҳад
ҚУРБИ АСЪОР: дар Тоҷикистон 1 рубли русӣ аз 0.1460 то 0.1480 сомонӣ муқаррар карда шудааст

Маводҳои таҳлилӣ