Дар Исфара ҷашни Сада — мужда аз оғози корҳои кишоварзиро бошукӯҳ таҷлил намуданд

Январь 27, 2022 11:06

ДУШАНБЕ, 27.01.2022. /АМИТ «Ховар»/. «Дар замони истиқлолият иди Сада баробари дигар маросиму суннатҳои миллии мо умри дубора пайдо карда, таҷлили ҳарсолаи он ба ҳукми анъана даромад ва дар  радифи ҷашнҳои миллиамон ба қонунгузории мамлакат ворид гардид». Чунин изҳори назар намуд Раиси шаҳри Исфара Баҳоваддин Баҳодурзода зимни таҷлили ҷашни Сада ва намоиши техникаи кишоварзӣ, ниҳолу гулбуттаҳо, сабзавоту меваҳои шаҳдрез дар ноҳияи мазкур.

Тавре аз Мақомоти иҷроияи ҳокимияти давлатии ноҳияи Исфара ба АМИТ «Ховар» хабар доданд, дар гулбоғи ба номи Сайфи Исфарангии маркази шаҳр, ки идгоҳи асосӣ буд, техникаи кишоварзӣ, ниҳолу гулбуттаҳо, сабзавоту меваҳои шаҳдрез ва тухмии зироат ба намоиш гузошта шуданд, ки ифодагари  омодагии марди деҳқон ба фасли баҳор мебошанд.

Раиси шаҳри Исфара Баҳоваддин Баҳодурзода иброз намуд, ки ба шарофати соҳибистиқлолӣ анъанаву суннатҳо ва ҷашнҳои миллии мардуми куҳанбунёди мо эҳё гардида, арҷгузорӣ ба онҳо сол ба сол бештар мешавад.

Зикр карда шуд, ки маҳсули ҳунарҳои мардумии  ба намоиш гузошташудаи намояндагони ҷамоатҳои шаҳраку деҳот, корхонаву ташкилот ва муассисаҳои таълимӣ аз завқи баланд, маҳорати беназир ва таърихи бойи косибиву ҳунармандӣ дар Исфара дарак медод.

Сада иди мужда аз тайёрӣ ва пеша намудани корҳои нави кишоварзӣ маҳсуб мешавад. Тоҷикон,  ки аз қадимулайём мардуми кишоварз буда,  бо меҳнату заҳмати хеш маводи ғизоӣ ба даст меоварданд, аз ин рӯ аввалин тарғибкунандагони ин иди аҷдодӣ мебошанд.

Ин маросими ҷашнӣ ҳамеша ба шакли бо ҳам ҷамъ шудани мардуми шаҳр, маҳалла ва деҳот дар як ҷо ва бо оташафрӯзии бузургу суруру шодмонӣ баргузор мегардад.

Зимни таҷлили ҷашни Сада дар вазъияти тантанавӣ ба беҳтарин кишоварзону боғпарварон ва чорводорони шаҳру деҳоти Исфара Сипоснома ва туҳфаҳои хотиравӣ супорида шуданд.

Дар анҷом барномаи фарҳангии пурмӯҳтаво пешкаши ҳозирин гардонида шуд.

АКС аз МИҲД н.Исфара

Январь 27, 2022 11:06

Хабарҳои дигари ин бахш

Иштироки соҳибкорони Тоҷикистон ва Чин дар намоишгоҳҳои байналмилалӣ баррасӣ гардид
Дар Душанбе Шурои иқтисодии Иттиҳоди Давлатҳои Мустақил баргузор мегардад
Дар ноҳияи Мастчоҳ мавсими пахтачинӣ оғоз шуд
Дар Кӯлоб оид ба истифодаи сарфакоронаи неруи барқ ҷаласа доир гардид
Хоҷагиҳои деҳқонии ноҳияи Ванҷ соҳиби 9 трактор гардиданд
МАСЛИҲАТИ МУТАХАССИС. Барои захира намудани картошка бунёди анбори муосири нигоҳдорӣ зарур аст
Масоили марбут ба ташаккули омори соҳаи технологияҳои иттилоотию коммуникатсионӣ баррасӣ гардид
Директори генералии Хазинаи Қатар оид ба рушд бо ҷараёни корҳои сохтмонӣ дар НБО «Роғун» шинос шуд
Байни Тоҷикистон ва Хазинаи Қатар оид ба рушд Созишномаи қарзи имтиёзнок барои сохтмони НБО «Роғун» ба имзо расид
Дар Москва ҷаласаи навбатии коршиносони Шурои роҳбарони хадамоти гумруки ИДМ баргузор гардид
Тоҷикистон ва Чин барои бунёди роҳҳои дусатҳа дар шаҳри Душанбе ба мувофиқа расиданд
Донишгоҳи байналмилалии сайёҳӣ ва соҳибкории Тоҷикистон ҳамкориро бо ширкатҳои хориҷӣ тақвият мебахшад