Файзалӣ Саидзода: Беш аз 2 ҳазор нафар кормандони соҳаи тиб бо вояи сеюми ваксина фаро гирифта шуданд
ДУШАНБЕ, 18.01.2022 /АМИТ «Ховар»/. То 17 январ 2 ҳазору 386 нафар табибон бо вояи сеюми ваксина бар зидди COVID-19 фаро гирифта шуданд, иттилоъ дод ба АМИТ «Ховар» директори генералии Муассисаи давлатии «Маркази ҷумҳуриявии иммунопрофилактика»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Файзалӣ Саидзода.
Ба гуфти мавсуф, тӯли як ҳафта аст, ки дар мамлакат миёни кормандони соҳаи тиб реваксинатсия ҷараён дорад. Тибқи нақша, баъд аз табибон шаҳрвандони синни аз 60 боло, нафарони дорои бемориҳои музмини ғайрисироятӣ бо вояи сеюми ваксина фаро гирифта мешаванд.
Дар оянда бо назардошти ворид шудани вояи ваксина иммунизатсия дар дигар шаҳру ноҳияҳои ҷумҳурӣ марҳила ба марҳила миёни гурӯҳҳои осебпазири аҳолӣ идома меёбад.
Ба иттилои Файзалӣ Саидзода, шаби 17 январ ба Тоҷикистон 1 млн 150 ҳазору 800 вояи ваксинаи Moderna ворид гардид.
Гуфта мешавад, ки имрӯз дар мамлакат ваксина ба қадри кофӣ мавҷуд аст. Дар нақша аст, ки бо анҷоми маъракаи гузаронидани вояи якум ва дуввуми ваксина соли 2022 тамоми шаҳрвандони мамлакат бо вояи сеюм фаро гирифта шаванд.
Ба гуфти ҳамсуҳбати мо, агар зимни ваксинагузаронӣ шахсоне, ки ба бемории сироятӣ ё зуком гирифтор ва дорои нишонаҳои ин бемориҳо бошанд, ваксинагузаронии ин гуна шахсон то давраи барқарор гардидани саломатии онҳо ба вақти дигар гузошта мешавад.
АМИТ «Ховар» қаблан тавсияҳои табиби маъруфи эронитабори Амрико, роҳбари Пажӯҳишгоҳи байналмилалии тандурустӣ ва тадқиқотии Ню-Йорк Ораш Алоиро нашр намуда буд. Мавсуф иброз дошт, ки «ваксинаҳо қариб то 100 фоиз дар пешгирӣ аз фавт ва шадид нагузаштани ҷараёни беморӣ самаранок мебошанд. Барои ҳамин бояд ҳама ваксина гиранд, то фавт ва шадидшавии беморӣ пешгирӣ гардад. Илм собит кардааст, ки тамоми ваксинаҳо, аз ҷумла ваксинаи COVID-19 муфиданд ва оризаҳояшон бисёр кам аст. Ба ин хотир тавсияи ҳатмӣ медиҳам, ки аз ҳамаи ваксинаҳое, ки дастрас ҳастанд, истифода кунед ва ҳеҷ кас набояд аз ваксина задан манъ шавад, магар касоне, ки дар айни замон худашон бемор бошанд. Пас, шахсе, ки ҳатто дар гузашта бемориро гузаронидааст, ӯ низ метавонад ваксина занад. Суоле, ки ҳамеша аз ман мепурсанд, ин аст, ки касоне бемориҳои дил, диабет, раг ва ё гурда доранд, метавонанд ваксина зананд? Бале, онҳо бояд ваксина гиранд. Чунки онҳо бемориҳои музмин доранд ва ҳатман бояд дар марҳилаи аввал ваксина зананд. Шахсоне, ки ваксина гирифтаанд, метавонанд аз намуди нав сироят ёбанд, вале онҳо бемориро бисёр мулоим паси сар мекунанд».
Фирӯза ДАВЛАТЗОДА,
АМИТ «Ховар»
АКС аз бойгонии АМИТ «Ховар»
Президенти Ҷумҳурии Тоҷикистон Эмомалӣ Раҳмон бо медали «Барои хизматҳо дар рушди ҳамкории башардӯстона» сарфароз гардонида шуданд
ТОҶИКИСТОН — МИЗБОНИ ЧОРАБИНИҲОИ МУҲИМИ БАЙНАЛМИЛАЛӢ. Интихоби Душанбе чун макони баргузории ин чорабиниҳои муҳим ба таҷриба, эътибор ва нуфузи байналмилалии мамлакат асос ёфтааст
Вуруди Резервати биосферии «Ромит» ба Шабакаи ҷаҳонии мамнуъгоҳҳои ЮНЕСКО — рӯйдоди муҳим дар соҳаи экологии Тоҷикистон
ДИПЛОМАТИЯИ ТОҶИКИСТОН: АЗ СУХАНРОНИИ ТАЪРИХӢ ТО ТАШАББУСҲОИ ГЛОБАЛӢ. Эҳдо ба Рӯзи кормандони хизмати дипломатии Тоҷикистон
Президенти Тоҷикистон: «Таъсиси Маркази минтақавии зеҳни сунъиро дар шаҳри Душанбе салоҳи кор мешуморем»
Пиряхҳо ва дигар манбаъҳои обии Тоҷикистон то 60 фоизи захираҳои оби Осиёи Марказиро ташкил медиҳанд
Тоҷикистон дар соҳаи дипломатияи об мавқеи фаъол дорад
Тоҷикистон аз пайомадҳои манфии раванди тағйирёбии иқлим нигарон мебошад
Эмомалӣ Раҳмон: «Қатъномаи махсуси СММ оид ба эълон кардани «Даҳсолаи таҳкими сулҳ ба хотири наслҳои оянда» мавриди баррасӣ қарор дода шавад»
Президенти Тоҷикистон: «Маҷмаи Умумии СММ имконияти эълон намудани Соли байналмилалии маърифати ҳуқуқиро мавриди баррасӣ қарор диҳад»
Муҳаммадҷаъфари Ёҳаққӣ: «Мо раҳбари хирадмандеро меситоем, ки дасти як миллатро бар «Шоҳнома»-и устоди Тӯс кушода кард»
Бо пешниҳоди Тоҷикистон 14 қатъномаи Маҷмаи Умумии СММ оид ба масъалаҳои обу иқлим қабул гардид
