Вазорати маориф ва илми Тоҷикистон ба мактаби №55-и шаҳри Ваҳдат мизу курсӣ тақдим намуд

ДУШАНБЕ, 17.03.2022. /АМИТ «Ховар»/. 16 март бо дастури Вазири  маориф ва илми Ҷумҳурии Тоҷикистон Раҳим Саидзода ба муассисаи таҳсилоти миёнаи умумии №55 –и  шаҳри Ваҳдат мизу курсиҳои таълимӣ барои 50 ҷойи нишаст тақдим гардид, хабар доданд ба АМИТ «Ховар» дар маркази матбуоти  Вазорати маориф ва илми мамлакат.

Тавре АМИТ «Ховар» қаблан иттилоъ дода буд, 15 март Вазири маориф ва илми кишвар Раҳим Саидзода  бо мақсади шиносоӣ бо вазъи таълиму тарбия, мушкилоти муассисаҳои таълимӣ дар шаҳру ноҳияҳои ҷумҳурӣ  аз муассисаи таҳсилоти миёнаи умумии №55 шаҳри Ваҳдат дидан намуд.

Вазир бо омӯзгорони муассисаи таълимӣ ҳамсуҳбат гардида, таъкид кард, ки мақсад аз ташриф ба муассиса ва суҳбати имрӯза огоҳ шудан аз вазъи соҳа, аз забони омӯзгорон шунидани проблемаву мушкилоти ҷойдошта, муайян намудани роҳҳои баланд бардоштани мақоми омӯзгор ва дар ин замина ҷиҳати рушди соҳа шунидани таклифу пешниҳодҳост.

Омӯзгорони муассисаи таълимии мазкур доир ба норасоии китобҳои дарсӣ, омӯзгори фанни забони англисӣ, таъмирталаб будани муассиса, фурӯши билетҳои киною театр ва китобҳои гуногун, санҷишҳои ғайрисоҳавию ғайринақшавӣ ва ғайра таклифу пешниҳодҳо манзур намуданд.

Аз ҷумла, зимни суҳбат омӯзгорон иброз доштанд, ки яке  аз мушкилоти асосии муассисаи таълимӣ норасоии ҷойи нишаст мебошад. Бо дархости омӯзгорон ва мусоидати Вазорати маориф ва илм имрӯз ин мушкилӣ ҳалли худро ёфт. 

Аксҳо: маркази матбуоти  Вазорати маориф ва илми ҶТ