Бахшида ба 30-солагии Иҷлосияи XVI Шӯрои Олӣ дар Академияи миллии илмҳои Тоҷикистон конференсияи илмӣ-амалӣ баргузор шуд

Июнь 17, 2022 13:42

ДУШАНБЕ, 17.06.2022 /АМИТ «Ховар»/. Имрӯз бахшида ба 30-солагии Иҷлосияи XVI — уми Шӯрои Олии Ҷумҳурии Тоҷикистон дар  Академияи миллии илмҳои Тоҷикистон конференсияи илмӣ-амалӣ таҳти унвони  «Иҷлосияи XVI — уми Шӯрои Олии Ҷумҳурии Тоҷикистон — оғози марҳилаи нави давлатдории миллӣ» баргузор шуд. Дар ин бора котиби матбуоти Академияи миллии илмҳои Тоҷикистон (АМИТ) Машраби Абдуллоҳ ба АМИТ «Ховар» хабар дод.

Президенти Академияи миллии илмҳои Тоҷикистон, академик Фарҳод Раҳимӣ зикр кард, ки «Иҷлосияи XVI — уми Шӯрои Олии Ҷумҳурии Тоҷикистон аксуламале алайҳи зӯроварии дохилӣ ва фитнаи хориҷӣ буд, вокунише дар муқобили андешаҳои таҳмилии аз кишварҳои исломӣ ба мо боргардида маҳсуб меёфт ва аз ҳама асосӣ сароғози марҳилаи нави ихтиёрдории қудрат дар таҳия ва роҳандозӣ шудани низоми сиёсии новобаста ва мустақил дар ҳудуди кишварамон арзёбӣ мешуд. Бинобар ин, аз хориҷи мамлакат бар мо ҷангро таҳмил намуданд, ки даҳсолаҳо давлати миллии тоҷиконро аз рушди ҳамаҷониб боздошт ва хисороти азиме ба бор овард, аммо бо ибтикор ва кӯшишҳои Президенти кишвар, Пешвои муаззами миллат муҳтарам Эмомалӣ Раҳмон роҳҳои рафъи муноқишаҳо ва бозоварии фирориён аз марзи кишварҳои ҳамсоя татбиқ гардида, якпорчагии давлат ва масъалаи ҳастиву нестии миллати тоҷик бо натиҷаи мусбат ҳал гардид».

— Аз ин хотир, нақши Иҷлосияи мазкур дар сарнавишти давлату миллати тоҷик аҳамияти таърихӣ дошта, дар дирӯзу имрӯзи мамлакатамон армуғони ҳасткунанда маҳсуб мешавад, — гуфт Фарҳод Раҳимӣ ва таъкид намуд, ки ҷомеашиносон бояд ин рӯхдоди таърихиро ҳаматарафа омӯхта, мавриди пажӯҳиши саҳеҳ қарор диҳанд, чунки чунин ҳодисаҳо барои ҳар миллате дарси ибрат аст.

Сипас намояндаи бахши Ёрдамчии Президенти Ҷумҳурии Тоҷикистон оид ба масъалаҳои иҷтимоӣ ва робита бо ҷомеаи Дастгоҳи иҷроияи Президенти кишвар Масрур Абдуллозода дар мавриди аҳамияти таърихии Иҷлосияи мазкур сухан карда, онро нахустинқадам дар роҳи давлатсозии миллӣ ном бурд.

Муовини аввали Вазири маориф ва илми Ҷумҳурии Тоҷикистон Ҷамшед Ҷӯразода  иброз дошт, ки Иҷлосияи XVI Шӯрои Олӣ мавқеи Сарвари давлатро нисбат ба ояндаи кишвар маълум гардонид ва аз он вақт то кунун ҳадафҳои сиёсии Ҳукумати Ҷумҳурии Тоҷикистон рушди давлати миллӣ мебошад.

Муовини Вазири фарҳанги мамлакат Манучеҳр Шарифзода  пешниҳод  намуд, ки роҳҳои муаррифӣ сохтани Иҷлосия чун мактаби сиёсии давлатдории миллӣ ба роҳ монда шавад.

Баъдан Раиси Иттифоқи нависандагони Ҷумҳурии Тоҷикистон Низом Қосим нақши калидии Иҷлосияро тараннум карда, иқрор намуд, ки воқеан, ин иҷлосия  таърихию тақдирсоз буд ва алъон ҳеҷ кас шакку шубҳа надорад, ки ба мо, тоҷикон давлати миллиро ато намудааст.

Олимони АМИТ бо маърӯзаҳои илмӣ дар ҳамоиш баромад карда, мавзўро бо дарназардошти қонуни асосии илм, яъне таҳқиқу пажӯҳиш мавриди баррасӣ қарор доданд ва андешаи ин ки Иҷлосия дар ояндаи наздик ба мактаби омӯзишии таҷрибаи сиёсӣ дар шахсияти Пешвои миллат муҳтарам Эмомалӣ Раҳмон қарор бигирад, ҳамовозӣ ёфт.

Акс: АМИТ

Июнь 17, 2022 13:42

Хабарҳои дигари ин бахш

Дар назди 20 муассисаи таълимӣ биноҳои иловагӣ бо озмоишгоҳҳои замонавӣ сохта мешаванд
Доир ба амалисозии барномаҳои давлатии марбут ба таҳсилоти томактабӣ ҷаласаи корӣ баргузор гардид
Дар Донишгоҳи техникии Тоҷикистон Чемпионати ҷаҳонии касбӣ баргузор гардид
Дар Душанбе Озмуни ҷумҳуриявии «Барномасози ҷавон» баргузор шуд
Дар назди муассисаҳои таълимии ноҳияи Рашт синфхонаҳои иловагӣ ба истифода дода шуданд
Дар Душанбе даври сеюми Озмуни ҷумҳуриявии «Фурӯғи субҳи доноӣ китоб аст» ҷамъбаст гардид
Аз аввали соли таҳсил маоши вазифавии кормандони соҳаи маориф 30 фоиз зиёд карда мешавад
Ба соҳаи маорифи вилояти Суғд Сертификат дар ҳаҷми 3,3 миллион сомонӣ тақдим карда шуд
Дар Сингапур ҳамоиши байналмилалӣ оид ба соҳаи маориф баргузор шуд
Ба тамоми шуъбаҳои маорифи Тоҷикистон беш аз 9 миллион китоби дарсӣ ва маводи таълимӣ дастрас карда мешавад
НАВГОНӢ ДАР СОЛИ НАВИ ТАҲСИЛ. Дар Тоҷикистон ба дониш ва малакаи хонандагон дар сатҳи 10 хол баҳо гузошта мешавад
Форуми дуюми Донишкадаи ҷумҳуриявии такмили ихтисос баргузор шуд