Намояндаи Тоҷикистон дар Форуми VI байналмилалии Осиёи Марказӣ бахшида ба сифати таҳсил иштирок намуд

ДУШАНБЕ, 10.10.2022 /АМИТ «Ховар»/. 7 октябр дар Форуми VI байналмилалии Осиёи Марказӣ, ки дар мавзӯи «Ҳамкории байналмилалӣ дар фазои глобалии маориф» баргузор гардид, ректори Донишгоҳи давлатии ҳуқуқ, бизнес ва сиёсати Тоҷикистон Муъмин Шарифзода тариқи маҷозӣ иштирок намуд, хабар доданд ба АМИТ «Ховар» дар ДДҲБС.

Форуми байналмилалӣ махсус буда, аз тарафи Агентии мустақили аккредитатсия ва рейтинги Қазоқистон ташкил карда шудааст. Он имкон медиҳад, ки табодули таҷриба ва ақидаҳо дар самти таъмини сифати таълим ба роҳ монда шавад.

Имсол дар форум намояндагони 13 давлат, аз ҷумла ИМА, Олмон, Туркия, Болгария, давлатҳои ИДМ ва Осиёи Марказӣ иштирок намуданд.

Муъмин Шарифзода дар мавзӯи «Аккредитатсияи байналмилалӣ ҳамчун шарти ворид шудан ба фазои таҳсилоти ҷаҳонӣ» маърӯза ироа намуд, ки ба масъалаҳои мубрами таъмини сифати таълим тавассути ҳамкории байналмилалӣ бахшида шуда буд.

Акс: ДДҲБС