Ғолибони Фестивали дӯстии ҷавонону варзишгарони шаҳри Душанбе қадрдонӣ гардиданд

ДУШАНБЕ, 15.11.2022. /АМИТ «Ховар»/. Имрӯз дар «Кохи Суруш»-и пойтахт маросими ҷамъбаст ва қадршиносии ҷоизадорони Фестивали дӯстии ҷавонону варзишгарони шаҳри Душанбе таҳти унвони «Зебоӣ, доноӣ ва тавоноӣ аз варзиш аст!» дар вазъияти тантанавӣ баргузор гардид. Фестивал аз рӯи 7 намуди варзиш: гӯштини миллӣ, шоҳмот, тенниси рӯи миз, варзиши сабук, футбол, баскетбол, волейбол баргузор шуда, дар он 237 нафар ғолибон бо диплому сипоснома ва туҳфаҳои хотиравии Мақомоти иҷроияи ҳокимияти давлатии шаҳри Душанбе қадрдонӣ карда шуданд, иттилоъ медиҳад мухбири АМИТ «Ховар».

Зимни ифтитоҳи фестивал муовини Раиси шаҳри Душанбе Дилшод Одинзода иштирокчиён ва ғолибонро аз номи роҳбарияти Мақомоти иҷроияи ҳокимияти давлатии шаҳри Душанбе табрик намуда, иброз дошт, ки бо таваҷҷуҳ ва роҳнамоиҳои Раиси шаҳри Душанбе муҳтарам Рустами Эмомалӣ бо мақсади дар сатҳи баланди ташкилӣ истиқбол гирифтани ҷашнҳои миллию таърихии Рӯзи Президенти Ҷумҳурии Тоҷикистон ва 30-солагии Иҷлосияи XVI Шӯрои Олии Ҷумҳурии Тоҷикистон  аз 28 октябр то 14 ноябр Фестивали 3-юми дӯстии ҷавонону варзишгарони шаҳри Душанбе таҳти унвони «Зебоӣ, доноӣ ва тавоноӣ аз варзиш аст!» миёни муҳассилини донишгоҳу донишкадаҳо, коллеҷу омӯзишгоҳҳо ва муассисаҳои таҳсилоти миёнаи умумии ҳудуди пойтахт баргузор карда шуд.

Фестивали мазкур соли сеюм аст, ки баргузор гардида, ҳадаф аз он  баланд бардоштани ҳисси миллӣ, худшиносиву ватанпарастии ҷавонон, ҷалби аҳолӣ ба варзиш, таъмини оммавият, дарёфти чеҳраҳои нави варзишӣ, ҳавасмандии насли ҷавон нисбат ба дастгириҳои давлатӣ дар бахши варзиш ва пешгирии ҳолатҳои ҷинояткорӣ миёни насли ҷавон ба ҳисоб меравад.

Зикр шуд, ки аз оғози расмии фестивал, яъне 2 ноябр то анҷоми он қариб 12 ҳазор нафар сокинони пойтахт, аз ҷумла ҷавонон ба ҷалб гардида, ба ҳавасмандӣ ва иттилооти зарурӣ фаро гирифта шуданд.

Зарангези ЛАТИФ,
Тоҳири САИД (АКС)

АМИТ «Ховар»