Дар Донишгоҳи миллии Тоҷикистон курси таълимии «Сарварони сиёсӣ» ташкил гардид

Декабрь 3, 2022 09:24

ДУШАНБЕ, 03.12.2022. /АМИТ «Ховар»/. Пешвои миллат муҳтарам Эмомалӣ дар паёми шодбошии имсолаашон ба муносибати Рӯзи ҷавонони Тоҷикистон зикр намуданд, ки «Ватанро сидқан ва самимона дӯст доштан, бо он ифтихор кардан, барои ҳимояи сарзамин омода будан, ба қадри истиқлолу озодӣ, сулҳу оромӣ, суботи сиёсӣ ва ваҳдати миллӣ расидан, шукронаи соҳибватаниву соҳибдавлатӣ ва эҳтироми падару модарро ба ҷо овардан аз ҷумлаи арзишҳое мебошанд, ки ҳар кадоми шумо – ҷавонон бояд ин арзишҳоро дастури зиндагии ҳаррӯзаи худ қарор диҳед». Аз ин суханони Сарвари давлат дар машғулияти аввалини курси таълимӣ, ки таҳти унвони «Сарварони сиёсӣ» 1 декабр дар Донишгоҳи миллии Тоҷикистон баргузор гардид, ёдоварӣ карда шуд.

Тавре аз Донишгоҳи миллии Тоҷикистон ба АМИТ «Ховар» хабар доданд, дар курси мазкур донишҷўён бо роҳбарони аввали вазорату кумитаҳо, ходимони шинохтаи давлатӣ, аҳли илму фарҳанг ва собиқадорони меҳнат мулоқот намуда, доир ба таҷрибаи андўхтаи онҳо дар роҳи расидан ба муваффақиятҳо суҳбат меороянд.

Машғулияти аввалин бо иштироки Ректори ДМТ Қобилҷон Хушвахтзода баргузор шуд. Мавсуф дар оғоз мухтасар перомуни аҳамияти гузаронидани курсҳои таълимии мазкур ва ҳадафи он сухан гуфта, сипас дар мавриди сиёсати давлатии ҷавонон ва дастгирии ин қишри ҷомеа аз ҷониби Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ибрози назар кард.


Мавсуф дар қисми дигари суҳбат доир ба худшиносии фардию масоили ватандорӣ, пайваста дар пайи омўзиши илму ҳунар шудану донишазхудкунии ҷавонон ба иштирокдорон маслиҳатҳои муфид доданд.

«Давлат ба ҷавонони донишманд, поквиҷдон ва таҳсилдида эҳтиёҷ дорад. Ҷавонон бояд ҳар лаҳзаи худро ғанимат шуморанд ва мудом аз пайи мутолиа бошанд. Ба масъалаҳои иқтисодию иҷтимоии мамлакат воқеъбинона назар кунанду фарҳанги баланди сиёсӣ дошта бошанд ва манфиатҳои миллиро пуштибонӣ намоянд»,- гуфт профессор Қ. Хушвахтзода.

Дар ҷараёни машғулият Ректори Донишгоҳ оид ба даврони донишҷӯӣ ва зинаҳои минбаъдаи фаъолияти худашон қисса карда, таъкид намуд, ки фаъолиятро аз раиси созмони ҷавонони факултет оғоз намуда, танҳо дар натиҷаи заҳмату омўзиши пайваста то ба ин зина расидааст.


Дар интиҳои дарс донишҷӯён аз Ректори ДМТ доир ба шароити илмию таълимӣ дар донишгоҳ ва ҷалби ҷавонон ба озмуну олимпиадаҳои сатҳи байналмилалӣ саволҳо доданд.

Қ. Хушвахтзода роҷеъ ба саволҳои додашуда ҷавобҳои мушаххас дода, дар самти омӯзиши забонҳои хориҷӣ, ташкили ҳамоишҳои хусусияти тарбиявӣ-ватандӯстидошта, тарғибу ташвиқи сиёсати созандаи Ҳукумати кишвар, иштироки фаъол дар фазои иттилоотӣ ва озмуну олимпиадаҳои сатҳи байналмилалӣ таклифҳои муфид пешниҳод намуд.

Рухсораи НУР,
АМИТ «Ховар»

АКС: Донишгоҳи миллии Тоҷикистон

Декабрь 3, 2022 09:24

Хабарҳои дигари ин бахш

Дар Тоҷикистон то соли 2027 фарогирии кӯдакон ба таҳсили томактабӣ ба 33 фоиз расонида мешавад
Бо мақсади таъмин намудани рушди минбаъдаи муассисаҳои таҳсилоти ибтидоӣ ва миёнаи касбӣ 300 миллион сомонӣ ҷудо карда мешавад
Академияи сайёҳии Донишгоҳи байналмилалии сайёҳӣ ва соҳибкории Тоҷикистон таъсис дода мешавад
Дастаи Донишгоҳи техникии Тоҷикистон дар Чемпионати ҷаҳонии касбӣ сазовори ҷойи якум гардид
Зиёда аз 36 ҳазор хонандагони синфҳои ибтидоии Тоҷикистон бо хӯроки гарм таъмин мегарданд
Дар Тоҷикистон Барномаи давлатии омода намудани кадрҳои омӯзгорӣ таҳия карда мешавад
Омӯзгорону хонандагони шаҳри Роғун суханронии Президенти Тоҷикистонро ба муносибати Рӯзи дониш якҷоя тамошо намуданд
Эмомалӣ Раҳмон: «Дар 34 соли соҳибистиқлолӣ ба соҳаи маориф 73,6 миллиард сомонӣ маблағгузорӣ гардидааст»
ДОНИШ — ПОЯИ МУҲИМТАРИНИ РУШДИ ДАВЛАТ ВА МИЛЛАТ. Эҳдо ба Рӯзи дониш
Дар назди 20 муассисаи таълимӣ биноҳои иловагӣ бо озмоишгоҳҳои замонавӣ сохта мешаванд
Доир ба амалисозии барномаҳои давлатии марбут ба таҳсилоти томактабӣ ҷаласаи корӣ баргузор гардид
Дар Донишгоҳи техникии Тоҷикистон Чемпионати ҷаҳонии касбӣ баргузор гардид