Дар Тоҷикистон таътили зимистонаи хонандагони муассисаҳои таълимӣ то 16 январ тамдид гардид

ДУШАНБЕ, 10.01.2023. /АМИТ «Ховар»/. Дар тамоми муассисаҳои таълимии Тоҷикистон (муассисаҳои томактабӣ ва таҳсилоти умумӣ) новобаста аз шакли ташкилию ҳуқуқӣ таътили зимистона то 16 январ тамдид карда шуд. Дар ин бора ба АМИТ «Ховар» дар маркази матбуоти Вазорати маориф ва илми мамлакат хабар доданд.

Вазорати маориф ва илми Ҷумҳурии Тоҷикистон ба таваҷҷуҳи омӯзгорон ва падару модарон мерасонад, ки бо дар назардошти сард омадани ҳаво ва бо мақсади ҳифзи саломатии тарбиятгирандагону хонандагон дар асоси фармоиши Вазири маориф ва илми Ҷумҳурии Тоҷикистон аз 10 январи соли равон «Дар бораи тамдид намудани таътили зимистонаи хонандагон дар муассисаҳои томактабӣ ва таҳсилоти умумӣ» таътили зимистона тамдид карда шуд.

Машғулиятҳо дар муассисаҳои томактабӣ ва таҳсилоти умумӣ аз 16 январ соли равон оғоз гардида, соатҳои дарсии дар давоми таътил иҷронашуда тибқи ҷадвали алоҳидаи тасдиқгардидаи дарси иловагӣ дар нимсолаи дуюми соли таҳсили 2022-2023 аз ҳисоби таътили баҳорӣ ва тобистона ҷуброн карда мешаванд.

Ҳамзамон дар асоси фармоиши мазкур сардорони Сарраёсати маорифи шаҳри Душанбе, раёсатҳои маорифи Вилояти Мухтори Кӯҳистони Бадахшон, вилоятҳои Суғду Хатлон, сардорони раёсату мудирони шуъбаҳои маорифи шаҳру ноҳияҳои тобеи ҷумҳурӣ, директорони муассисаҳои таълимии дорои мақоми ҷумҳуриявӣ ва хусусӣ уҳдадор гардидаанд, ки ҷиҳати ба таътил баромадани хонандагон тадбирҳои зарурӣ андешанд.

Ёдовар мешавем, ки аз 10 то 15 январ бо сабаби воридшавии анбӯҳи ҳавои сарди арктикӣ аз самти минтақаҳои шимолию аврупогии Федератсияи Россия ва Сибири Ғарбӣ дар бештари манотиқи кишвар пастшавии ҳарорат то 15-20 дараҷа пешгӯӣ мешавад. Инчунин 11-15 январ дар бештари ноҳияҳои водӣ-доманакӯҳии ҷумҳурӣ ҳарорат шабона аз 8 то 19 дараҷа хунук, рӯзона аз 7 то 12 дараҷа хунук, дар ноҳияҳои кӯҳӣ шабона аз 11 то 24 дараҷа хунук, рӯзона аз 5 то 17 дараҷа хунук дар назар аст.

 АКС аз бойгонӣ