ТАЪТИЛИ ЗИМИСТОНА. Хонандагон ба маҳфилҳои адабӣ ва машғулияти варзишӣ ҷалб карда мешаванд

ДУШАНБЕ, 03.01.2023. /АМИТ «Ховар»/. Дар тамоми муассисаҳои таҳсилоти умумии  мамлакат таътили даҳрӯзаи зимистона ҷараён дорад. Тибқи нақшаи Вазорати маориф ва илми Ҷумҳурии Тоҷикистон, хонандагони тамоми муассисаҳо ба маҳфилҳои адабӣ ва фарҳангӣ, инчунин мутолиаи китобҳои бадеӣ машғул мешаванд, иттилоъ медиҳад АМИТ «Ховар».

Аз ҷумла, дар МТМУ рақами 41- и ноҳияи Восеъ низ маҳфилҳои гуногуни маърифатӣ ташкил гардидаанд, ки дар онҳо хонандагон ба китобхонӣ ҷалб карда мешаванд.

Директори мактаб Иноят Давлатов гуфт, ки дар ин давра барои хонандагони хурдсол маҳфилҳои «Қоидаҳои муносибат бо китоб»,  «Ҷалби кӯдакон ба китобу китобхона», «Сохти китоб», «Рӯзнома ва маҷаллаҳо барои кӯдакон», «Ифоданок ва таъсирбахш қироат намудани ашъор», барои хонандагони синфҳои 4-5 «Навиштани иншо аз рӯи асари мутолиашуда» ва бозиҳои варзишӣ гузаронида мешаванд.

Хонандаи синфи 4-и муассисаи мазкур  Алишери Ҷумъахонзода новобаста ба синни хурдсолӣ ба ин маҳфилҳо ҷалб гардида, хушҳол аз он аст, ки тавассути ин гуна дарсҳои омӯзишӣ донишу ҷаҳонбинии худро васеъ менамояд.

«Завқи китобхониро дар дили ман омӯзгорон ва падару модарам бедор намудаанд. Дар вақти мутолиа агар ҷоеро нафаҳмам, волидайнам ба ман кумак мекунанд. Аз ҳамсолонам даъват менамоям, ки биёед,  китоб хонем, то дар оянда роҳи дурусти зиндагиамонро интихоб карда тавонем»,-мегӯяд ӯ.

Тавре қаблан иттилоъ додем, Вазорати маориф ва илми кишвар  аз ҳамаи падару модарон даъват ба амал овардааст, ки дар таътили зимистона  назорати ҷиддӣ бурда, нагузоранд, ки фарзандонашон бештари вақти худро бо истифодаи телефони мобилӣ ва корҳои беҳуда гузаронанд. Ҳамчунин волидайн бояд монеи оворагардӣ  ва сарфи беҳудаи вақти онҳо дар кӯчаю марказҳои интернетӣ гарданд.

 Зарангези ЛАТИФ,
АМИТ «Ховар»

АКС: АМИТ «Ховар