Хизматчиёни давлатии Тоҷикистон дар шаҳри Беппуи Ҷопон фарҳанги миллати тоҷикро муаррифӣ карданд

ДУШАНБЕ, 02.02.2023 /АМИТ «Ховар»/. Хизматчиёни давлатии Тоҷикистон дар шаҳри Беппуи Ҷопон фарҳанги миллати тоҷиконро муаррифӣ карданд, хабар доданд ба АМИТ «Ховар» дар Агентии хизмати давлатии назди Президенти Ҷумҳурии Тоҷикистон.

Дар фестивали фарҳангӣ, ки 29 январ дар шаҳри Беппуи Ҷопон бо ташаббуси ҳукумати шаҳри Беппу доир гардид, намояндагони Тоҷикистон, Узбекистон, Индонезия, Шри Ланка, Покистон, Бангладеш ва дигар давлатҳои минтақа фарҳанг ва таомҳои миллии худро муаррифӣ намуданд.

Хизматчиёни давлатии Тоҷикистон аз вазорату идораҳои ҷумҳурӣ, ки масъули муаррифии гӯшаи Тоҷикистон буданд, ба ҷопониён ва хориҷиёни шаҳри Беппу оид ба фарҳанг, урфу одат ва анъанаҳои тоҷикон иттилоъ дода, ба онҳо таомҳои тоҷикиро пешкаш намуданд. Кулчаи тоҷикӣ, самбӯса ва оши палав ба ташрифоварандагон писанд омад. Ин имконияти мусоиде буд, ки ҷопониён ва сокинони шаҳри зебоманзараи Беппу оид ба Тоҷикистон, манзараҳои нотакрор, урфу одат ва таомҳои миллии он огаҳӣ пайдо созанд.

Намояндагони Тоҷикистон иброз доштанд, ки «таваҷҷуҳи зиёди тамошобинон ба гӯшаи Тоҷикистон ҳар яки моро сарфароз аз он намуд, ки мо соҳибдавлатему соҳибватан, фарҳангу анъанаву суннатҳои таърихии ғанӣ дорем, ки сарбаландона онҳоро ҳамчун мероси миллати тоҷик миёни ҳазорҳо нафар хориҷиён муаррифӣ менамоем».

Мавриди тазаккур аст, ки Беппу шаҳри сайёҳӣ буда, ба шарофати мавҷуд будани гармчашмаҳои табиӣ ҳамасола беш аз 11 миллион сайёҳи дохилию хориҷӣ меҳмони он мешаванд. Ҳамзамон дар ин шаҳр Донишгоҳи Осиё ва Уқёнуси Ороми Ритсумейкан (APU) ҷойгир шудааст, ки чандин нафар шаҳрвандони Тоҷикистон тибқи барномаи JDS зинаҳои магистратура ва докторантураро дар он хатм намудаанд. Дар айни замон 5 нафар хизматчиёни давлатӣ аз Ҷумҳурии Тоҷикистон дар ин донишгоҳ таҳсили худро муваффақона идома дода истодаанд.

АКС: Агентии хизмати давлатии назди Президенти Ҷумҳурии Тоҷикистон