Намояндагони ширкати «GAZ Group»-и Русия аз корхонаҳои саноатии шаҳри Бӯстон боздид намуданд
ДУШАНБЕ, 17.02.2023 /АМИТ «Ховар»/. 15 феврал намояндагони ширкати «GAZ Group»-и вилояти Нижегороди Федератсияи Русия дар доираи сафари корӣ ба вилояти Суғди Ҷумҳурии Тоҷикистон аз корхонаҳои «Тоҷфилиз» ва «Хуҷанд-ЗИЛ»-и шаҳри Бӯстон боздид намуданд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Бӯстон хабар доданд.
Зимни шиносоӣ бо фаъолияти ҶДММ «Тоҷфилиз» ба ҳайати меҳмонон иттилоъ дода шуд, ки корхонаи мазкур бо иштироки бевоситаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон мавриди истифода қарор гирифта, самти фаъолияти он истеҳсоли мех ва мехҳои печон бо истифода аз ашёи хоми воридотӣ аз Русия, Қазоқистон ва Чин мебошад.
Таъкид гардид, ки маҳсулоти тайёри корхона воридотивазкунанда ва ба содирот нигаронида мебошад.
Дар корхонаи «Хуҷанд-ЗИЛ»-и КВД «Фулузоти нодири Тоҷикистон» иттилоь дода шуд, ки масоҳати умумии корхонаи мазкур 19 гектар буда, дар он 15 коргоҳи истеҳсолии калонҳаҷм мавҷуд мебошанд, ки метавон онҳоро барои истеҳсоли мошинсозӣ истифода кард.
Намояндаи ширкати «GAZ Group»-и Русия зимни боздид маълумот дод, ки дар истеҳсолоти корхона мошинҳои мусофиркашонии тамғаҳои «ГАЗел», «ГАЗ», автобусу микроавтобусҳои мусофиркашонӣ, нақлиёти замонавии ёрии таъҷилӣ ва дигар намуди нақлиёт истеҳсол мешаванд.
Иттилоь дода шуд, ки корхонаи мазкур дар 4 вилояти Русия чунин корхонаҳоро ба истифода додааст, ки дар онҳо қариб 20 ҳазор нафар бо ҷойи кори доимӣ таъмин шудаанд. Ҳамзамон таъкид гардид, ки дар натиҷаи сафари кории гурӯҳи сохибкорони вилояти Суғд ба вилояти Нижегородск тасмим гирифта шуд, ки бо истифода аз имконоти корхонаҳои саноатии вилояти Суғд корхонаи мошинбарорӣ ба роҳ монда шавад.
Зимни шиносоӣ бо имконоти корхонаҳои саноатии шаҳри Бӯстон тазаккур дода шуд, ки корхонаҳои ҶДММ “Тоҷфилиз” ва корхонаи «Хуҷанд-ЗИЛ» имкон доранд барои мошинҳои аз ҷониби ширкати Русия истеҳсолшаванда корпусҳои асосӣ ва қисмҳои зарурии нақлиётро вобаста бо фармоиш пешниҳод намоянд. Тасмим гирифта шуд, ки ҷиҳати рушди соҳа ҳамкории корхонаҳо ба роҳ монда шавад.
Шаҳри Бӯстон шаҳри саноатӣ буда, дар доираи Солҳои рушди саноат (2022-2026) мақомоти иҷроияи ҳокимияти давлатии шаҳр якҷо бо соҳибкорони ватанӣ азм дорад шумораи коргоҳу корхонаҳои истеҳсолиро дар шаҳр зиёд намояд.
Дар айни замон дар шаҳри Бӯстон 45 корхонаи истеҳсолӣ фаъолият дошта, 12 адади он соли 2022 ба қайд гирифта шуд. Саноатчиёни шаҳри Бӯстон соли 2022 ҳаҷми истеҳсолро ба 673 млн сомонӣ расониданд, ки нисбат ба соли 2021 117, 4 фоизро ташкил дод.
АКС: Мақомоти иҷроияи ҳокимияти давлатии шаҳри Бӯстон
Ҳамкории Тоҷикистон ва Нидерланд дар татбиқи Рӯзномаи амал оид ба об дар Ню-Йорк баррасӣ шуд
Президенти мамлакат Эмомалӣ Раҳмон дар ноҳияи Сино ҶДММ «Ҷавоҳироти заргарии Зарафшон»-ро ба истифода доданд
Сарвари давлат Эмомалӣ Раҳмон марҳилаи дуюми Корхонаи истеҳсоли халтаҳои полипропиленӣ, платаҳои чопӣ ва фурӯзонакҳои диодии ҶДММ «Ғаюр Гуруҳ»-ро ифтитоҳ намуданд
Пешвои миллат Эмомалӣ Раҳмон дар ноҳияи Исмоили Сомонӣ корхонаи истеҳсоли маҳсулоти нонию қаннодии ҶДММ «Нонпаз»-ро ба истифода доданд
Дар шафати роҳҳои Тоҷикистон 30 адад нуқтаҳои баркашӣ бо тарозуҳои статсионарӣ, динамикӣ ва мобилӣ муҷаҳҳаз фаъолият доранд
Масъалаи таҳияи Стандартҳои миллии экологӣ, иҷтимоӣ ва идоракунии корпоративӣ дар Тоҷикистон баррасӣ гардид
ТАЪМИНИ АМНИЯТИ ОЗУҚАВОРӢ. Дар Тоҷикистон имсол дар майдони беш аз 6 ҳазор гектар картошка кишт гардид
РУШДИ САНОАТ. Дар корхонаҳои саноатии шаҳри Исфара ҳаҷми истеҳсоли маҳсулот меафзояд
Маркази миллии патенту иттилооти Тоҷикистон ва Ташкилоти патентии Авруосиёӣ ҳамкориро тавсеа мебахшанд
Соли равон дар вилояти Суғд 55559 тонна картошка ва 37415 тонна пиёз ҷамъоварӣ шудааст
Дар Хатлон корхонаи саноатии батареяҳои офтобӣ сохта мешавад
Дар Тоҷикистон ҳаракати воситаҳои нақлиёти вазнин, ки зиёда аз 40 тонна бор интиқол медиҳанд, манъ аст
