Хизматчиёни давлатии Тоҷикистон барои таҳсил ба Нидерландия мераванд
![](https://khovar.tj/wp-content/uploads/2023/04/Hizmatchiyoni-davlatii-To-ikiston-.jpg)
ДУШАНБЕ, 22.04.2023 /АМИТ «Ховар»/. Хизматчиёни давлатии Тоҷикистон аз рӯи барномаи магистрии яксола оид ба захираҳои об ва рушди устувор барои таҳсил ба Нидерландия фиристода мешаванд, хабар доданд ба АМИТ «Ховар» дар Агентии хизмати давлатии назди Президенти Ҷумҳурии Тоҷикистон.
Дар Агентии хизмати давлатӣ бо иштироки намояндагони Кумитаи иҷроияи Фонди байналмилалии наҷоти Арал ва хизматчиёни давлатӣ аз Вазорати энергетика ва захираҳои оби Ҷумҳурии Тоҷикистон, Агентии беҳдошти замин ва обёрии назди Ҳукумати Ҷумҳурии Тоҷикистон, Академияи миллии илмҳои Тоҷикистон ва Маркази тадқиқоти стратегии назди Президенти Ҷумҳурии Тоҷикистон вобаста ба ҷалби хизматчиёни давлатӣ барои таҳсил аз рӯи барномаи магистрии яксола оид ба захираҳои об ва рушди устувор дар Донишкадаи байналмилалии идораи захираҳои об дар шаҳри Делфти Подшоҳии Нидерланд ҷаласаи корӣ баргузор шуд.
Дар ҷаласаи иброз гардид, ки ҳамкории байналмилалии густурдаи Ҳукумати Ҷумҳурии Тоҷикистон бо мақсади рушди захираҳои инсонӣ ва омода намудани кадрҳои баландихтисос бо давлатҳои хориҷа ба таври дахлдор ба роҳ монда шуда, ҳамасола хизматчиёни давлатӣ ҳам дар дохил ва ҳам дар хориҷ ба зинаҳои гуногуни таҳсил, такмили ихтисос ва таҷрибаомӯзӣ фаро гирифта мешаванд.
Кумитаи иҷроияи Фонди байналмилалии наҷоти Арал дар доираи раванди ҳамкорӣ бо Подшоҳи Нидерланд ҷиҳати омодагӣ ба Конфронси оби СММ дар соли 2023 ташаббусро оид ба таҳсил аз рӯи барномаи магистрии яксола оид ба захираҳои об ва рушди устувор дар Донишкадаи байналмилалии идораи захираҳои об дар шаҳри Делфти Подшоҳии Нидерланд роҳандозӣ намуда, дар ҳамкорӣ бо Агентии хизмати давлатӣ ҷиҳати интихоби довталабон-хизматчиёни давлатӣ аз вазорату идораҳои калидӣ тадбирҳои судманд амалӣ намуда истодааст.
Дар ҷараёни ҷаласаи корӣ намояндагони Кумитаи иҷроияи Фонди байналмилалии наҷоти Арал бо хизматчиёни давлатӣ суҳбат анҷом дода, ҷиҳати мушаххас намудани талабот, тартиби баргузории озмун ва имконияту шароити таҳсил мубодилаи назар намуданд.
Хизматчиёни давлатии хоҳишманд пас аз ғалаба дар озмун барои таҳсил аз рӯи барномаи магистрии яксола оид ба захираҳои об ва рушди устувор ба Донишкадаи байналмилалии идораи захираҳои оби шаҳри Делфти Подшоҳии Нидерланд фиристода мешаванд.
АКС: Агентии хизмати давлатии назди Президенти Ҷумҳурии Тоҷикистон