Аз ноҳияи Ашт ба хориҷи Тоҷикистон 4 ҳазор тонна ҳосили барвақтии зардолу содирот гардид

ДУШАНБЕ, 23.06.2023. /АМИТ «Ховар»/. Дар мавсими имсола аз ноҳияи Ашти вилояти Суғд ба хориҷи мамлакат зиёда аз 4 ҳазор тонна ҳосили барвақтии зардолу содирот гардид. Тайи ду-се соли охир дар ҳудуди ноҳия беш аз 400 гектар боғи нави зардолу бунёд карда шуд, ки қисми зиёди онҳо, аллакай, ба ҳосил даромадаанд, хабар медиҳад АМИТ «Ховар» бо истинод ба мақомоти иҷроияи ҳокимияти давлатии ноҳияи мазкур.

Моҳи май деҳқонони ноҳия зардолуҳои шаҳдбори барвақтиро ба кишварҳои дуру наздики хориҷӣ, аз қабили Русия, Қазоқистон ва минтақаҳои алоҳидаи Аврупову кишварҳои арабӣ содирот намуданд.

Дар 18 ҳазор гектар боғҳои зардолуи ноҳия, ки 11 ҳазор гектараш ҳосилдеҳ мебошад, навъҳои серҳосил ва пешпазаки ба шароити ноҳия мутобиқгашта, ба монанди: «Мирсанҷалӣ», «Бобоӣ», «Исфарак», «Рухи ҷавонон», «Офтобак» ва «Тоҷибоӣ парвариш мешаванд.

Ҳоло дар ноҳия ба ҷамъоварии оммавии зардолу машғул мебошанд. Ҳамарӯза 8-9 ҳазор нафар ба ёрии боғдорони ноҳия баромада, рӯзе аз 150 то 350 сомонӣ маблағ ба даст меоваранд.

Хотиррасон мешавем, ки дар вилояти Суғд, асосан, дар шаҳру навоҳии Исфара, Конибодом, Ашт, Бобоҷон Ғафуров, Айнӣ ва Кӯҳистони Мастчоҳ зиёда аз 50 ҳазор гектар боғи зардолу мавҷуд аст, ки дар онҳо зиёда аз 32 навъи зардолу парвариш мешавад. Интизор меравад, ки боғдорони вилоят дар мавсими имсола зиёда аз 100 ҳазор тонна зардолу истеҳсол намоянд.

Ёдовар мешавем, ки 26 июни соли 2018 Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар тантанаҳои Иди нон, асал ва зардолу, ки дар хиёбони Исмоили Сомонии шаҳри Хуҷанд бо шукуҳу шаҳомати хос баргузор гардид, иштирок намуданд.

Президенти мамлакат муҳтарам Эмомалӣ Раҳмон дар ин чорабинӣ деҳқонону боғпарварони асили вилоят ва ҳам роҳбарияти шаҳру ноҳияҳои онро ба афзун кардани нишондодҳои боғу токпарварӣ, хусусан васеъ намудани зардолузор ҳидоят намуда, таъкид доштанд, ки Тоҷикистон метавонад дар самти парвариши зардолу ва содироти меваи хушк дар ҷаҳон пешсаф гардад. Ҳамин аст, ки борҳо ташкилоту озмоишгоҳҳои бонуфузи байналмилалӣ ба сифату тамъи меваҳои шаҳдбори Тоҷикистон, аз ҷумла зардолу баҳои баланд додаанд.

АКС аз бойгонӣ