Дар Хоруғ ҷаласаи Шӯрои ректорони муассисаҳои таҳсилоти олии касбии Ҷумҳурии Тоҷикистон баргузор гардид

ДУШАНБЕ, 25.06.2023. /АМИТ «Ховар»/. 24 июн дар Донишгоҳи давлатии Хоруғ ба номи Моёншо Назаршоев дар доираи таҷлили Рӯзи Ваҳдати миллӣ ҷаласаи Шӯрои ректорони муассисаҳои таҳсилоти олии касбии Ҷумҳурии Тоҷикистон баргузор гардид, хабар медиҳад АМИТ «Ховар» бо истинод ба донишгоҳи мазкур.

Ҳайати Шӯро бо раванди таълиму тарбия ва   дастовардҳои илмӣ-таҳқиқоти ва шароити моддӣ-техникии донишгоҳ шинос шуданд.

Аз ҷониби аъзои Шӯрои ректорони муассисаҳои таҳсилоти олии касбии Ҷумҳурии Тоҷикистон ба Донишгоҳ компютерҳои насли нав, проэктор, экран ва телевизорҳои калонҳаҷм тақдим гардид.

Ёдовар мешавем, ки Донишгоҳи давлатии Хоруғ ба номи Моёншо Назаршоев маҳсули даврони соҳибистиқлолӣ буда, бо ибтикори Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъсис ёфт ва барои соҳаҳои иқтисодию иҷтимоии мамлакат кадрҳои баландихтисосу касбӣ омода менамояд.

Бояд тазаккур дод, ки Шӯрои ректорони муассисаҳои таҳсилоти олии касбии Ҷумҳурии Тоҷикистон дорои мақоми доимоамалкунандаи машваратии назди Вазорати маориф ва илми Ҷумҳурии Тоҷикистон мебошад.

АКС: Донишгоҳи давлатии Хоруғ ба номи М. Назаршоев