Пахтакорони ноҳияи Спитамен тасмим гирифтаанд, ки 14 ҳазору 600 тонна пахта ҷамъоварӣ намоянд

ДУШАНБЕ, 24.09.2023. /АМИТ «Ховар»/. Имсол пахтакорони ноҳияи Спитамен тасмим гирифтаанд, ки​ 14 ҳазору 600 тонна пахта ҷамъоварӣ намоянд. Бо истифода аз рӯзҳои офтобии фасли тирамоҳ заркорон ба ҷамъоварии ҳосил машғул мебошанд. Дар ин хусус ба АМИТ «Ховар» дар Хадамоти матбуоти Раиси вилояти Суғд хабар доданд.

Раиси вилоят зимни боздид аз​ хоҷагиҳои деҳқонӣ дар ғунучини пахта саҳм гузошта, ба кишоварзону чинакчиён барои сари вақт ва беталаф ҷамъ овардани пахта тавсияҳо дод. Тазаккур дода шуд, ки барои қадршиносии меҳнати пахтакорон мусобиқаи меҳнатӣ ташкил шудааст ва ҳар ноҳияе, ки​ дар бистрӯзаи аввали пахтачинӣ пешсафӣ нишон диҳад, бо мукофотпулӣ сарфароз гардонида мешавад.

Раиси вилоят ба як зумра чинакчиён туҳфаҳо тақдим намуда, меҳнати пурсамарашонро зимни ғунучини ҳосил тавсиф намуд.​ Зеро дар ноҳия чинакчиёне ҳастанд, ки дар як рӯз​ то 240 кг пахта мечинанд ва  музди хуби корӣ ба даст меоранд.​ ​ ​ ​

АКС: Хадамоти матбуоти Раиси вилояти Суғд