Пешвои миллат: «Тоҷикистон дар арсаи байналмилалӣ ба сифати давлати ташаббускор дар ҳалли мушкилоти глобалии обу иқлим эътироф гардидааст»

Сентябрь 8, 2023 11:33

ДУШАНБЕ, 08.09.2023. /АМИТ «Ховар»/. Имрӯз дар паёми шодбошии худ ба муносибати 32-солагии Истиқлоли давлатӣ Президенти мамлакат муҳтарам Эмомалӣ Раҳмон иброз доштанд, ки имрӯз Тоҷикистон дар арсаи байналмилалӣ ба сифати давлати ташаббускору пешсаф дар ҳалли мушкилоти глобалии вобаста ба обу иқлим эътироф гардидааст.

«Пешбурди сиёсати «дарҳои кушода» дар замони соҳибистиқлолӣ ба мо имкон фароҳам овард, ки бо ҳамаи давлатҳои ҷаҳон ва созмонҳои бонуфузи байналмилалӣ робитаҳои дӯстӣ ва ҳамкории мутақобилан судмандро ба роҳ монем», — таъкид намуданд  Сарвари давлат.

Дар идома Роҳбари давлат тазаккур доданд, ки боиси ифтихори мардуми шарифи тоҷик аст, ки то ба ҳол панҷ ташаббуси Тоҷикистон аз ҷониби ҷомеаи ҷаҳонӣ, яъне Созмони Милали Муттаҳид дастгириву ҷонибдорӣ ёфта, дар миқёси сайёра амалӣ гардида истодааст.

Ёдовар мешавем, ки 1 сентябр Маҷмаи Умумии Созмони Милали Муттаҳид (СММ) қатъномаи «Пайгирии натиҷаҳои Конфронси СММ оид ба фарогирии миёнамуҳлати Даҳсолаи байналмилалии «Об барои рушди устувор», 2018-2028»-ро, ки аз ҷониби Ҷумҳурии Тоҷикистон, Подшоҳии Нидерландия ва Ҷумҳурии Сенегал пешбарӣ шуда буд, бо иттифоқи оро қабул намуд. Ҳамин тариқ, ҷомеаи ҷаҳонӣ ташаббуси навбатии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ҷиҳати соли 2028 дар Тоҷикистон баргузор намудани Конфронси Созмони Милали Муттаҳид оид ба арзёбии фарогири ниҳоии татбиқи ҳадафҳои Даҳсолаи байналмилалии амал «Об барои рушди устувор», солҳои 2018- 2028-ро пазируфт.

Бояд хотиррасон намуд, ки бори нахуст ин ташаббус аз ҷониби  Президенти Тоҷикистон  зимни Конфронси оби Созмони Милали Муттаҳид (22-24 марти 2023 дар Ню-Йорк) садо дода буд.

Қатъномаи мазкур дар асоси ташаббусу пешниҳодҳои кишварҳои аъзои Созмони Милали Муттаҳид, ки дар Конфронси оби СММ эълон гардида буданд, омода шуда, ишора ба суръати пасти ноилшавӣ ба Ҳадафҳои рушди устувор то соли 2030 менамояд ва таъсири манфии ин равандро барои инсоният дар роҳи расидан ба рушди устувор таъкид месозад.

Қатънома инчунин таҳкими ҳамкории байналмилалӣ дар ҳама сатҳҳоро ҷиҳати дар амал татбиқ кардани ҳадафу мақсадҳои марбут ба обу санитарияи Рӯзномаи 2030, хусусан барои давлатҳои рӯ ба тараққӣ зарур мешуморад.

Дар бахши амалиётии қатънома дар баробари қарори баргузории Конфронси оби Созмони Милали Муттаҳид соли 2028 дар Тоҷикистон инчунин соли 2026 барпо намудани Конфронси СММ оид ба масъалаҳои об ҷиҳати суръатбахшии татбиқи Ҳадафҳои Рушди Устувор (ҲРУ) 6 таъйид гардидааст.

Инчунин Маҷмаи Умумии Созмони Милали Муттаҳид аз Дабири кулли СММ даъват ба амал овардааст, ки то охири иҷлосияи 78-уми Маҷмаи Умумии Созмони Милали Муттаҳид дар машварат бо давлатҳои аъзои СММ стратегияи фарогирро оид ба обу санитария омода ва ба кишварҳои аъзо пешниҳод намояд.

Қабул гардидани санади мазкур бори дигар шаҳодат аз он медиҳад, ки ҷомеаи ҷаҳонӣ нақши боризи Тоҷикистонро ҳамчун давлати пешбарандаи масъалаҳои об дар арсаи байналмилалӣ муҳим хонда, ба ташаббус ва иқдомҳои мо эътимоду боварии комил дорад.

Воқеан ҳам,  Конфронси СММ оид ба об дар Ҷумҳурии Тоҷикистон (соли 2028), ки бори аввал дар мамлакатамон баргузор мегадад, барои боз ҳам баланд бардоштани обруву нуфузи ҷумҳурӣ рӯйдоди таърихӣ ва беназир хоҳад шуд.

АКС аз бойгонӣ

Сентябрь 8, 2023 11:33

Хабарҳои дигари ин бахш

Тоҷикистон ва Узбекистон масъалаи омода намудани мутахассисонро дар соҳаҳои илмҳои дақиқ ва техникӣ баррасӣ намуданд
ЛИГАИ ЧЕМПИОНҲОИ ОСИЁ. То имрӯз беш аз 10 000 чиптаи бозии дастаҳои футболи «Истиқлол» ва «Ал-Наср» фурӯхта шудааст
«РОҒУН»- ИНШООТИ АЗИМИ АСР. Гурӯҳи омӯзгорону донишҷӯёни Донишгоҳи славянии Русия ва Тоҷикистон бо ин неругоҳ шинос шуд
Дар Тоҷикистон лоиҳаи нави давлатии сармоягузорӣ таҳти унвони «Дастгирии кишоварзӣ дар заминаи ҷомеа плюс» (CASP+) оғоз гардид
Президенти Академияи миллии илмҳои Тоҷикистон дар ҷаласаи Комиссияи давлатҳои ИДМ оид ба истифодаи неруи атомӣ бо мақсадҳои осоишта иштирок намуд
Намояндаи Тоҷикистон дар ҷаласаи нахустини Комиссия оид ба ҳуқуқи инсони Иттиҳоди Давлатҳои Мустақил дар Минск иштирок намуд
Дар Донишгоҳи байналмилалии забонҳои хориҷии Тоҷикистон масъалаҳои тарҷума ва тарҷумашиносӣ баррасӣ гардиданд
Дар шаҳри Хоруғ имтиҳонҳои қабул ба магистратураи «Мактаби давлатдории Эмомалӣ Раҳмон» доир шуданд
Ҳайати Тоҷикистон дар иҷлосияи 20-уми Конфронси кулли UNIDO дар Вена иштирок дорад
Барои дарёфти Ҷоизаи давлатии Ҷумҳурии Тоҷикистон ба номи Абӯабдулло Рӯдакӣ дар соли 2024 озмун эълон гардидааст
Намояндаи Тоҷикистон дар ҷаласаи 114-уми Шурои Созмони байналмилалии муҳоҷират иштирок намуд
ИСТИФОДАИ ОҚИЛОНАИ ЗАМИН. Кишоварзони ноҳияи Ҷайҳун мақсад гузоштаанд истеҳсоли лимӯро ба 7000 тонна расонанд