Имрӯз дар Душанбе маросими муаррифии коғазҳои нави қиматноки давлатӣ баргузор гардид

Январь 9, 2024 16:39

ДУШАНБЕ, 09.01.2024 /АМИТ «Ховар»/. Имрӯз дар шаҳри Душанбе маросими муаррифии (Roadshow) коғазҳои нави қиматноки давлатӣ бо арзиши рақобатпазир дар бозори муташаккил баргузор гардид, ки Вазорати молияи Тоҷикистон ва Бонки Осиёии Рушд созмондиҳандагони ин чорабинӣ буданд.

Хабарнигори АМИТ «Ховар» иттилоъ медиҳад, ки дар маросими муаррифии коғазҳои нави қиматноки давлатӣ роҳбарият ва масъулини Вазорати молия, Бонки миллии Тоҷикистон, бонкҳои мамлакат, бахши хусусӣ, блоки иқтисодии мамлакат, ташкилоти қарзӣ ва сармоягузорон иштирок намуданд.

Таъкид шуд, ки ин тадбир ҷиҳати татбиқи вазифаҳое, ки дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» пешниҳод гардидаанд, андешида шудааст. Президенти Ҷумҳурии Тоҷикистон дар Паём ба Маҷлиси Олӣ ба вазорату идораҳои марбутаи ҷумҳурӣ дастур дода буданд, ки бо мақсади ҷалби сармояи дохиливу хориҷӣ ҷиҳати рушди бозори коғазҳои қиматнок, бахусус коғазҳои қиматноки «сабз» ва бозори такрорӣ тадбирҳои зарурӣ андешанд.

Вазири молияи ҷумҳурӣ Файзиддин Қаҳҳорзода дар маросими муаррифии барориши нахустини коғазҳои қиматноки давлатӣ иброз намуд, ки Вазорати молия тасмим гирифтааст, ки вомбаргҳои давлатиро бо арзиши бозорӣ ба муомилот барорад, то бо он тавонад ба воситаи муассири сармоягузорӣ, таъмини уҳдадориҳо ва идоракунии пардохтпазириҳо мусоидат намояд. Инчунин Вазири молияи Тоҷикистон шариконро даъват намуд, ки ин иқдомро ҳамаҷониба дастгирӣ намуда, дар рушди бозори коғазҳои қиматнок дар Тоҷикистон саҳм гузоранд.

Ҳамзамон Вазири молия муаррифии барориши коғазҳои қиматноки давлатиро дар биржаи фондӣ бо арзиши бозорӣ, ки 17 январи соли равон баргузор мешавад, хабар дод.

Инчунин Раиси Бонки миллии Тоҷикистон Ҳоким Холиқзода бароиши коғазҳои нави қиматноки давлатиро барои муомилоти васеъ бо арзиши бозорӣ ба мақсад мувофиқ шуморида, гуфт, ки Бонки миллии Тоҷикистон ҷиҳати дастгирии ин масъала омода аст.

Ҳамзамон дар маросими муаррифии коғазҳои нави қиматноки давлатӣ мушовири маҳаллии Бонки Осиёии Рушд оид ба шартҳои эмиссия, механизми ҷойгиркунӣ ва бартарияти сармоягузорӣ ба коғазҳои қиматноки давлатӣ ибрози назар намуд. Гуфта шуд, ки коғазҳои қиматноки давлатӣ коғазҳои қиматноки боэътимод ва пардохтпазир буда, бо кафолати давлатӣ таъмин гардида, бо хавфҳои ниҳоӣ ҳамроҳ мешаванд. Барориш ва ҷойгиркунии коғазҳои қиматноки давлатӣ тавассути платформаи биржаи ваколатдор амалӣ мегардад. Харидорони коғазҳои қиматноки давлатӣ ҳам шахсони ҳуқуқӣ ва ҳам шахсони воқеӣ, аз ҷумла ғайрирезидентҳо шуда метавонанд. Барои ҷалби сармоягузорони хориҷӣ ба ҳама барориши коғазҳои қиматноки давлатӣ рамзи байналмилалии идентификатсионӣ (ISIN) дода мешавад.

Дар анҷоми маросими муаррифии коғазҳои нави қиматноки давлатӣ китоби фармоишҳо кушода шуд, ки он тавассути рамзи QR инъикос гардидааст. Дилхоҳ харидор метавонад барои харидани коғазҳои қиматноки давлатӣ фармоиши пешакии худро пешниҳод намояд.

Марзия САИДЗОДА,
АМИТ «Ховар»

АКС: АМИТ «Ховар»

Январь 9, 2024 16:39

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
ҚУРБИ АСЪОР: дар Тоҷикистон 1 евро аз 11.1532 то 11.2000 сомонӣ муқаррар шудааст
Дар Неругоҳи барқи обии «Роғун» роботи махсуси кафшерӣ ба истифода дода шуд
ҚУРБИ АСЪОР: дар Тоҷикистон 1 рубли русӣ аз 0.1198 то 0.1220 сомонӣ муқаррар шудааст
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид