РАВАНДИ ОБИ ДУШАНБЕ. Иштирокдорони Конфронси сеюми байналмилалии сатҳи баланд бо фаъолияти Неругоҳи барқи обии «Норак» шинос шуданд
ДУШАНБЕ, 13.06.2024. /АМИТ «Ховар»/. Меҳмонон ва иштирокдорони Конфронси сеюми байналмилалии сатҳи баланд бахшида ба Даҳсолаи байналмилалии амал «Об барои рушди устувор, солҳои 2018-2028», ки аз 10 то 13 июни соли 2024 дар Душанбе баргузор гардид, имрӯз бо яке аз иншооти муҳими стратегии Тоҷикистон — Неругоҳи барқи обии «Норак» шинос шуданд, иттилоъ медиҳад хабарнигори АМИТ «Ховар».
Меҳмонон ва иштирокдоронро дар даромадгоҳи шаҳри Норак сокинон бо нону намак, рақсу тарона ва бо меҳмоннавозии хоссаи тоҷикона пешвоз гирифтанд.
Онҳо бо фаъолияти Неругоҳи барқи обии «Норак» шинос шуда, обанбори Норак, агрегатҳо ва осорхонаи ин иншооти бузурги гидроэнергетикиро тамошо намуданд. Ба меҳмонон доир ба таърих ва фаъолияти неругоҳ маълумот дода шуд.
Гуфта шуд, ки агрегати якуми Неругоҳи барқи обии «Норак» 50 сол муқаддам — соли 1972 ба истифода дода шуда, моҳи декабри соли 1979 агрегати охирини неругоҳ барои истеҳсоли неруи барқ мавриди истифода қарор гирифт.
Иттилоъ дода шуд, ки дар натиҷаи сохтмони неругоҳ обанбори Норак ба вуҷуд омад, ки масоҳаташ 98 км мураббаъ, ҳаҷмаш 10,5 миллиард метри мукааб буда, 4,5 миллиарди мукааб оби обанбор ҳамчун оби тоза истифода бурда мешавад. Дарозии обанбор 70 км, бараш то 1 км, жарфияташ ба ҳисоби миёна 107 метрро ташкил медиҳад. Аз тарафи чап нақби обқабулкунак ва аз самти рост нақби обпарто мавҷуд аст.
Таъкид гардид, ки дар бунёди ин иншооти бузурги стратегию энергетикӣ намояндагони 50 халқу миллатҳои гуногуни ҷаҳон саҳм гузоштаанд. Неругоҳи Норак бо истеҳсоли неруи барқи аз лиҳози экологӣ тоза барои пешрафти саноати мамлакат заминаи мусоид фароҳам овард.
Меҳмонон маконҳои таърихӣ, иншооти истеҳсолиро тамошо карда, аз пазироии самимии мардуми сарбаланди Тоҷикистон, боду ҳавои форам, ҳусни нотакрори табиати ин сарзамин, обҳои мусаффои ҷонбахш таассуроти нек бардошта, Тоҷикистонро макони афсонавӣ номида, ба мардуми меҳмоннавозии он баҳои баланд доданд.
Бояд гуфт, ки ҳайат бо обанбори Норак шинос шуда, изҳор намуданд, ки воқеан ҳам Тоҷикистон — биҳишти рӯйи Замин аст. Манзараҳои дилфиреби мавзеъ ба меҳмонон руҳияи болида бахшид.
«Дар бораи Тоҷикистон бисёр шунида будам, вале он чизе, ки дар ин ҷо дидам, маро воқеан ҳам ба ваҷд овард. Табиати зебо, обанбор, боду ҳавои тозаи ин ҷо як биҳиштро мемонад. Хӯрокҳои миллии тоҷикӣ ба ман хеле писанд омад, зеро маззаи лазиз доранд. Агар имкон пайдо кунам, ҳар вақт ба тамошои манзараҳои Тоҷикистон ташриф меорам»,- чунин баён намуд таассуроташро намояндаи давлати Кувайт Фаҳад Ал-Зафери дар суҳбат бо хабарнигори АМИТ «Ховар».
Зарангези ЛАТИФ,
АМИТ «Ховар
Душанбе-Норак-Душанбе
АКС: АМИТ «Ховар
ИҚДОМҲОИ ПРЕЗИДЕНТИ ТОҶИКИСТОН ҶОМЕАИ ҶАҲОНРО БА ҲАМ ОВАРД! Таассуроти меҳмонон ва иштирокдорони Конфронси сеюми оби Душанбе аз тамошои дараи Ромит
РАВАНДИ ОБИ ДУШАНБЕ – ВАСИЛАИ МУҲИММИ ГУСТАРИШИ ҲАМКОРИИ ҶОМЕАИ ҶАҲОН
«OH TAJIKISTAN». Дар Кумитаи рушди сайёҳӣ муаррифии видеролики таблиғотӣ доир гардид
Дар Австрия оид ба Раванди оби Душанбе маълумоти муфассал пешниҳод гардид
ТОҶИКИСТОН — ШВЕЙТСАРИЯИ ДУЮМ. Меҳмонон ва иштирокдорони Конфронси оби Душанбе аз тамошои манзараҳои дилфиреби Варзоб, хусусан оби мусаффои дарёи Сиёма ангушти ҳайрат газиданд
ИҚТИСОДИ «САБЗ». Намояндаи Ироқ Ҳотам Ҳусейн: «Шумораи зиёди электромобилҳо дар Душанбе аз тадбирҳои тоза нигоҳ доштани муҳити зист дарак медиҳад»
Президенти Гурӯҳи Бонки исломии рушд Муҳаммад Сулаймон Ал-Ҷассер бо НБО-и «Норак» шинос шуд
Имконияти сайёҳии Тоҷикистон дар Олмон муаррифӣ гардид
Байни вазоратҳои корҳои хориҷии Тоҷикистон ва Ангола Барномаи ҳамкорӣ ба имзо расид
«ТОҶИКИСТОНРО ЧУН БИҲИШТИ РӮИ ЗАМИН ДАРЁФТЕМ». Бардошти меҳмонон пас аз шиносоӣ бо сохтмони Неругоҳи барқи обии «Роғун»
Дар Донишгоҳи байналмилалии забонҳои хориҷии Тоҷикистон оид ба «Истифодаи оқилонаи захираҳои об дар шароити тағйирёбии иқлим» ҳамоиш баргузор шуд
Президенти Бонки исломии рушд бо унвони «Профессори фахрӣ»-и Донишгоҳи байналмилалии сайёҳӣ ва соҳибкории Тоҷикистон сарфароз гардид
